“Los ijos de Israel, kedaron 430 anyos en Misraim. En el diya final de estos 430 anyos, todas las Armadas de D. salyeron de la tyerra de Misraim.”
“Esta noche (de Pesah)es la noche de guardiya para D. al salir de Bnei-Israel, de las tyerras de Misraim. Es la Nochede D., i todos los ijos de Israel seyan guardiyanos de jenerasyon, en jenerasyon..”
(Shemot- Kap.12-V.41-42)
“...a layla a ze, mi kol a leilot?” Kuanto fue demudada (estranya) la noche la esta, mas ke todas las noches?...La repuesta la meldamos en kada SEDER, en
la Hagada
de Pesah, fyesta de los prodigos de D.en favor del puevlo Djudio. Pesah es la fyesta en kuala mos sintimos ovligados de pozarmos preguntas... De transmeter muestra Historia i puede ser, azer teshuva... Esta Historia ampeso en Pesah. Salyendo del “yugo”i “esklavaje de Misraim, el puevlo Djudio gano su libertad. Una libertad ke lo enkargo tambyen d’un “yugo” ke el fue veluntaryo a achetar.
Dishimos ke noche de “SEDER” formulamos syertas demandas. “Ma Nishtana?”... Oganyo antes del Seder, tenemos otra pregunta. “Komo azer kuando Pesah ampesa en la nochada sigiendo Yom Shabbat?”. En jeneral, todas las ovligasyones son kumplidas el diya presedando Pesah. Naturalmente aki no ay menester de enumerarlas una por una. Keridos amigos, komo lo savesh el “Kal Hamira” va ser 18 Avril Vyernes demanyana. El “Biur Hamets”, Shabbat demanyana. Este diya espesyal es “Shabbat Hagadol”.
Bueno, oganyo el primer diya de Pesah koensida kon Alhad. Dunke una mayoriya de los aparejos de mued deven trokar de diya achakes de las egzijensyas del Shabbat. Si no me yerro, en el anyo 2005 ke bivimos una situasyon asemejante, tengo oyido un espri, una shakaika: “La fyesta de Pesah ya es bastante komplikada por si, i agora ke manera azeremos?”
Entonses ke izimos?.. O ke devemos azer oganyo?... Yo no pretendo konoser al fondo todas las egzijensyas i ovligasyones de muestra Ley, i syempre me entravo de dar konsejos sovre este sujeto. Si tengo dubyos miro a ambezarme, demando ayudo de un kompetente. Me ambezi ke oganyo ay una seria de trokamyentos ke, achakes d’el espasyo limitado no puedo dar en detalyo en esta oja.
“En Pesah, ay el reselo del “hamets”, las restriksyones de “Yom Tov.”Realizamos ke la verdadera libertad demanda una grande dishiplina, un sensyo de entendimyento. I, esto marka la alegriya de Pesah. Una alegriya ke no es espontanea, ma, ke egzija preparasyon i ovligasyones...” Son estos pensamyentos ke mos ovligan a pozarmos syertas preguntas. İ en una mezura, mos azen revenir si mos aleshimos del kamino djusto, i azer teshuva.
En el kalendaryo Ebraiko, Adar i Nissan, Purim i Pesah, estan uno detras de otro. La alegriya kalma en la selebrasyon de Pesah, es komo kompensasyon de la alegriya sin mezura de Purim. La natura ampesando a trokar de vestimyenta, se esta adornando de vedruras i de flores. Pesah es el verdadero konsepto de la alegriya djudia, la deskripsyon kontinual de muestra libertad. En este espirito, arresiveremos el mez de Nissan, kon
la Primavera
i la fyesta de Pesah. Otruna vez vamos a demandar: “Ma Nishtana?”, i en la mezura del posivle, vamos a dar eksplikasyones a muestros chikos...
HAG SAMEAH-MOADIM LESIMHA.
