İa FAO “Food and Agriculture Organization” (Organizasyon de la ONUpara la alimentasyon i la agrikultura) deklara ke la pujita de presyo de varyos produktos alimentaryos tendra una konsekuensa destruidera sovre el mantenimyento i la salud de multiples puevlos, lo ke sera una vyolasyon de los prinsipyos de baza de la “Deklarasyon de los Derechos del Ombre”.
Segun esta byen konosida Institusyon, la penuria de komanya bate aktualmente la puerta de 37 payizes...
Kalamidad de los tyempos pasados, syempre prenyada de mil i una desgrasyas (muerte de ninyos, sufriensas no solo fizikas ma tambyen morales de adultos, profito sordido de payizes poderozos al detrimento de los flakos, injustisya, umilyasyon, etc...) la ambrera va su kamino, kruel i sin piadad..
El instinkto de konservasyon de una persona ambyerta puede pusharla a kometer aktos dezastrozos aunke envezes komprensivles ..I sera entonses el triumfo de la barbaria kontra la sivilizasyon, de la muerte kontra la vida, del aborresimyento kontra la solidaridad...
En una epoka ande la kriansa umana puede ir asta la luna, ande los savyos lavoran para konkistar el “Espasyo ekstra terresto”, ande la teknolojia da al ombre un poder kaji sovre- umano, la ambre (paridera de konfliktos ke no konosen frontyeras) parese un akontesimyente afuera del tyempo, ke aze del ombre responsavle de si mizmo i de su entorno, el aprendinsto de la muerte.
Las razones son klaras: el aprovesimyento de la tyerra, un tyempo verdadera huente de mantenimyento del ombre, los trokamyentos atmosferikos konsekutivos al abuzo de una industrializasyon salvaje, el egoizmo de los payizes rikos, la falta de animo i de voluntad pozitiva de la parte de las viktimas, i partikularmente “la superpueblasyon” por razones seksuales i tambyen espirituales, sin dubyo sublimes en el pasado por sus objetivo de protejar la vida, ma ke no se adaptan a los tyempos aktuales
Es ke esto mos toka direktamente? “No”. Ma, la transparensya ke devino uno de los elementos de baza de la mundyalizasyon i partikularmente del progreso tekniko en todo modo de kampo, mete immedyatamente la persona del 21em siglo facha kon facha kon problemas ke no fueron nunka de la konosensya de sus avuelos i la arrankan (mizmo kontra su voluntad) a este estado de pasifika inyoransa ke era la kondisyon del ombre medyano.de los siglos presedentes.
Es ke la voluntad de salir de su chiko sirkulo de vida personal (ijos, ijas, paryentes, amigos, partenaryos de lavoro o konkorentes ets..”) pujo realmente?
Tambyen “No” en su totalidad. Portanto konsyentemente o inkonsyentemente, mizmo si es por un momento, un reflekso ataviko (ke es la partikolaridad de la kriansa pensante) mos pusha a formular kestyones... i formular kestyones es empesar a bushkar solusyones
Ke mos token o no, de leshos o de serka, estas kestyones mos persigen, mizmo si no mos konsernan, se instalan en muestro meoyo, mos ovligan a pensar a kavzos kon los kualos no tenemos ningun raporto i es solo a partir de este momento ke puede apareser una posivilidad de solusyon...
