Keridos Korelijionarios.
Ayegimos i este anyo tambien a los diyas de Pesah ke mos apregonan la primavera.
Todo en agredeseiendo a nuestro altisimo Dyo, vos kero rekordar una otra ves ke; las valores moral ke simboliza la fiesta de Pesah son akeyas ke renforsan nuestra fe i konfiensa a nuestro Dyo, akeyas ke enfortesen nuestra pertenensia relidjioza i soysala, akeyas ke valorizan nuestra unidad i entegridad i akeyas ke renforsan tambien nuestro sentimientos de solidaridad i asistensia.
El seder de Pesah ke nos aunamos alrededor todo en inspirando esto, nos da la oportunidad de pueder edukar a nuestros ijos. En su esensia
la Agada
de Pesah nos siniala esto en dizyendomos “ Veigadta Levinha Bayom Hau/ İ lo kontaresh a vuestros ijos en su diya”
Sigun mi, nuestros esforsos los mas espesiales i prioridosos deven de ser verso nuestros ijos ke mankan de asisitir o no pueden asistir alrededor del Seder de Pesah. Penso ke antes de todo devemos de estimularlos a ke tomen parte kon nozotros en este pranso, i por esto se deve de amostrar el esforso, el kudiado i la pasensya ke amostro Moşe Rabenu kuando rekovro el korderiko ke se alesho del rebanyo.
No tenemos la razon de estar endiferentes kuando se yeva el lovo o la aguila al ke se alesho del rabanyo. Esto lo konsidero de muy emportante i kero ser siguro ke va ser bien apresiado de vuestra parte.
Keridos Korelijionarios.
De otra parte la fiesta de Pesah simboliza nuestra transformasion del esklavaje a la libertad. A mi konviksion esto deve inkluir tambien la libertad de nuestro pensamiento i komporto. Kero indikar ke kuando kumplimos nuestros doveres relijiozos komo komunales, devemos de alesharnos de todo modo de ekstremidades.
No kale olvidar nunka ke las ekstremidades provokan las diferensyas ke dezazen la unidad i la entegridad de la komunidad.
Keridos Ermanos.
Profitando de la oportunidad, kero compartir kon vosotros siertos evenementos ke me asiguran verso el futuro.
A kavza de los esforsos de nuestros konsejeros i diridjentes los kualos ke yo mizmo so el testigo, nuestras institusiones, fondasiones i ovras estan fonksionando kon sukseso en yena armonia i fruktuosidad.
El saver ke nuestra eskola ke ya arivo a un punto de ser la eskola de preferensia en nuestra komunidad i ke en serka tiempo va alkansar a inchir su kapasidad me esta alegrando el korason.
Me plaze el ver ke los mansevos ke se estan edukando komo funksionarios relidjiosos ya empesaron a funksionar en nuestras sinagogas. Kero agradeser a todos nuestros diridjentes ke toman parte en esta mision.
Grasias a los lavoros fuertes de nuestros ermanos ke se dedikaron a la ovra, los primeros kuatro volumenes de nuestra Santa Tora fueron publikados kon sus traduksiones i eksplikasiones, i el sinken volumen esta para publikarse. Ay otros de nuestros ermanos ke kontribuen a nuestra vida kultural kon otras siertas publikasiones. Me plaze admirarlos i felisitarlos.
Keridos Korelijionarios.
Todos estos son evenementos ke mos apregonan nuestro futuro klaro.
Yeno de estos pensamientos i sentimientos vos suheto ke alkansesh a munchas fiestas de Pesah yenos de alegria, kon toda vuestra famiya, kon todos vuestros keridos i kon los ke vos keren todo en bediziendovos kon las bendisiones de nuestra santa Tora.
Hag Pesah Sameah
Moadim Lesimha
Rav İsak HALEVA
Gran Rabino
