Serka Pesah, un iluzyonisto, kon vestimyentas dezmizeryadas arrivo a Volhynie… Paresiya Djudio, portanto no teniya barva... Nunka lo vyeron komer, kasher, ni taref. La kuryozidad fue unanima. Ken disho ke viniya de Paris, ken Londra. Si alguno se aserkava, desparesiya i aparesiya en otro lugar. Prezentava numeros maraviyozos: kitar de los botes kordelas de kolores, dukados de oro, indianas, komer pedasos de braza ets…Todos enkantados, pensavan ke era echizos de guerko. Komo una persona tan kapache, podiya ser sedakero, inkapavle de pagar afilu la kira de su kaza? Esto es reelmente una sinkena pregunta de noche del SEDER!…
Vengamos a Hayim Beile, avyendo pyedrido su fortuna, biviya en la mizerya. No teniya ni alfinete para meter en prenda. No keryendo konfesar su estado se opozava al dezeo de su mujer Riwke de aderesarsen a
la Komunita. Nunka
pyedro su konfiensa en D., ke lo iva apiadar. Mankava poko para Pesah. Hayim asperando kon konfiensa el ayudo divino, Riwke, kayada, ovedesyendo a su marido… La mujer deve ovedeser a su marido, no es ansi?!, pensava yorando, sin pueder durmir las noches. Deviya guadrar su mizerya, i las vezinas le demandavan:
“Riwke, kuando pensas kozer las MATSOT? Izites esto, izites akeyo? Si estas en estrechura, te emprestaremos?…” Riwke, refuzava, no keryendo piadad. Alora, los vezinos se aderesaron al Rabino, ke disho: “Hayim es savyo, ya save lo ke aze, tyene una ferma konfiensa en D..”
Tadre de Pesah, Hayim, torno de
la Sinagoga
, a su kaza eskura. No teniyan ni kandelas para inogurar la fyesta. Todas las kazas estavan iluminadas, ma, el, dayinda estava esperando. Entro en dizyendo: ”Hag sameah, Riwke Beile.” Eya le respondyo de mizmo, kon una boz “mojada” de lagrimas. Hayim le disho, fyestando la salida de Misraim, no era permetido de ser triste.
“Si el Kriador kijo ke no tengamos muestro SEDER, devemos kontentarmos del de muestro vezino. Komo se dize esta noche:-KOL DIHPIN YETE VE YEKHOL-Todo el ke tyene ambre, venga i koma, todo el ke tyene de menester venga i paskue.”...Entervalo, marido i mujer, vyeron entrar uno, dizyendo: ”GUT YONTEV, keriya ser envitado a vuestro Seder...”
Hayim disho ke no teniyan sus SEDER, a kualo el estranyero respondyo: ”No importa, ya trushe yo uno. ”İzo un sinyo, i vyeron en la kamareta, doz kandelares de plata, kon las kandelas asendidas. Hayim i Riwke, enkantados, i un poko espantozos, vyeron al iluzyonisto. Kon otro djesto de la mano, el ombre ordeno el SEDER. El plato, kon todo lo menesterozo, las redomas de vino, las Matsot, todo estava ensima la meza. Afilu, los livros de HAGGADA, kon kachas muevas endoradas...
“Espero ke ay agua para lavarmos las manos?” demando el estranyero. Marido i mujer, se vinyeron en si, no dando portanto, sinyifikasyon a esto todo. Hayim, no keryendo deshar Riwke sola kon el ajeno, desidaron de ir endjuntos ande el Rav, ke los konsejo:
“Tornad a kaza. Si las kandelas estan asendidas,
la Matsa
se esta rompyendo, el vino esta koryendo, kijo dezir ke no es iluzyon. Es un dono de los sielos, puedesh servirvos de todo.”
Hayim i Riwke, tornaron a kaza. El iluzyonisto no estava ma, el SEDER en su lugar, kon toda su ermozura. Entonses, entendyeron ke el Profeta Eliau Anavi aviya pasado por sus kaza. Fue ansi, para eyos una ermoza i alegre noche de PESAH.
“Contes et Legendes d’Israel”
A todos amigos i lektores,
Hag Sameah C.D.
