Los dias vinyentes, komemorasyon de la mas grande desgrasya de la umanidad
Estamos fyestando Pesah, fin de un largo kativeryo, simbolo de vida, de salvasyon i de libertad, primer paso verso un futuro a fraguar en la esperansa i la konfiensa.
***
İ en unos kuıantos dias, vamos a komemorar la disparisyon de 6 milyones de muestros ermanos, 6 milyones de ombres, mujeres, ninyos, rezin nasidos, muertos en la umilyasyon, arrebashados el nivel de bestyas...
Komemorar es, si no darles vida, a lo manko asertar sus pasaje en este mundo ... renderles lo ke los matadores kijeron arrevatarles: la dinyidad de ser umanos, de ser kriansas pensantes ... komemorar es kaji azerles un lugar al lado de mozotros, en muestra memorya i en muestra sensibilidad...
I es kada persona kapavle de pensar i de djuzgar ke es konsernada por este rekuerdo amargo.
El jenosidyo no fue solo la fin de la egzistensya de 6 milyones de Djudyos ma tambyen una mancha sovre el onor de la umanidad , la prova ke en kada uno de entre mozotros se topa una parte eskura , echa de tinyevlas, ke devemos ambezar a dominar.
Ke ensenyo la Shoah al mundo ? No se egzaktamente ... Por seguro la promulgasyon de la “Deklarasyon de los Derechos del Ombre”, puede ser tambyen la kreasyon de syertas İnstitusyones umanitaryas en sus programa ma malorozamente kontinualmente akosadas por los interesos ekonomikos de varias potensyas i por un oportunizmo syempre prezente.
I a mozotros los ermanos de las viktimas, simples sitizanos de un mundo syempre en perikolo, ke mos ambezo el rekuerdo de esta trajedia?
Antes de todo a luchar kontra la injustisya, kual ke sea el kampo ande se topa... refuzar el ekstremizmo i el aborresimyento mizmo si eyos flatan muestro orgolyo ... denunsyar la falsedad i partikularmente la “medya verdar” mas terrivle ke la mentira.
Ay preseptos ke kale repetar, todo en savyendo ke esto puede pareser fastidyozo, i mizmo si tenemos la konviksyon ke es sin provecho.
No sigir la muchidumbre sin tener la konvinksyon ke eya se topa en el kamino de la razon i de la derechedad ... refuzar kualkyer prejuisyo ... kombatir la sufriensa (kuala ke sea la viktima , amiga o enemiga)... nunka kondenar sin dar la posibilidad al akulpado de defenderse.
I tambyen:”Oir” oir absolutamente el ke mos esta avlando, kual ke sea su linguaje ...mirar de entenderlo... no kedar limitados en muestros solos argumentos, kestyonarmos de mozotros para mozotros en toda simplisita, sin vanedad ni induljensya....
Ay de esto mas de 60 anyos , una muchidumbre de inosentes muryeron, entre eyos 6 milyones de muestros ermanos...mos akodraremos de todos.
Es ansi el paradokso del puevlo Judyo ...syempre solo en su destino, i portanto syempre atado a los otros en su pensamyento.
