Martes, el 29/4 la noche, sovre la inisyativa del prezidente Jozef Nassi, una realizasyon teatral alegoriko- filozofika, nombrada “Agada Hashoah” fue prezentada en la grande Keila Neve Şalom, debasho la direksyon de muestro kolavorador Izak Behar.
En su avla de entrada, el mos ambezo ke ansi ke lo disho el Talmud de Babilonia i segun una vyeja kreensa Djudia, egziste en el mundo 36 personas vertuozas ke tyenen el poder de ver kada dia la figura del “Bendicho Sea Su Nombre”.
Estas 36 personas no se konosen entre eyas i mizmo no tyenen enteramente konsensya de sus misyon sovre tyerra...
Sovre baza de esta kreensa, dos estudyantes de la universidad de Harward eskrivyeron, kon palavras medyas dichas medyas non pronunsyadas, el relato de la inkomparavle trajedia de la Shoah.
I, prevalyendose del teksto de esta mueva Agada, Linda Olmert instalada en Israel, kazada i aijada, se kargo de la ermoza misyon de espandir un poko en kada lugar del mundo, el kontenido de esta muy interesante prestasyon.
El objetivo es de no deshar olvidar ... no deshar despareser de la memorya kolektiva este terrivle epizodyo no solo de la Istorya Djudia ma tambyen de la Istorya Umana... el objetivo es sovre todo de luchar kontra el silensyo i la indiferensya progresiva.
Agada signifika “relato”... Por seguro no se puede imajinar ningun paralelo entre la Agada de Pessah lakuala ekspresa la salvasyon del puevlo Ebreo i el terrivle epizodyo ke undyo el mundo en el horror i la verguensa..
La Agada de Pessah es un enkaminamyento verso la luz i la vida, la de la Shoah: un enkaminamyento a senso uniko sin posibilidad de retorno, verso la muerte, la sufriensa i la umilyasyon.
De mezmo, ningun paralelo entre el sakrifisyo de Izak, ke es una atestasyon de la fidelidad de Avraam Avinu enverso su Dyo i la terrivle kayades ke akompanyo el jenosidyo. Personalmente no entyendo la atribusyon de la palavra “Holokosto” a la eksterminasyon de 6 milyones de inosentes, kulpantes unikamente de ser Djudyos.
Holokosto signifika ofranda echa a Dyo ...En su mizerikordya, “El Ke no Puedemos Nombrar” no pudo agradeser el sakrifisyo de la “ kriansa umana”, su ovra la mas presyoza, en la esplandor de su lusidita i la konsensya de su responsabilidad.
I es kontra esto ke devemos kombatir, sin kansarmos, sin espanto de enfasyar los otros...transmeter la triste istorya de este masakro sin razon ni posivle eksplikasyon, a muestros ijos, inyetos, sovrinos, a todos los ke no tendran la okazyon de enkontrar los ultimos testigos okularyos de esta desgrasya.
Ay milenaryos ke mos akodramos i avlamos de la Salidura de Ayifto, de los anyos de servidumbre, del milagro de un muevo renasimyento del puevlo Ebreo... milenaryos ke fyestamos Purim, ke komemoramos la destruisyon del Bed Amigdash ... Muestros avuelos tuvyeron la sagasidad de pensar ke kalia absolutamente konservar estos rekuerdos afin de asegurar la perenidad del Djudaizmo...
Azeremos lo mezmo por el rekuerdo de la Shoah, lo devemos a los 6 milyones de muestros ermanos, muertos sin sepultura... No se trata de asumir sus destino, ma simplemente el kudyo de sus rekuerdo, lo ke enrezyara, en kada uno de entre mozotros, el senso de la responsabilidad i sovre todo de la solidaridad.
Munchas grasyas a Linda Olmert, Jozef Nasi, İzak Behar i todos los myembros de muestra komunidad ke akseptaron de asumir la personalidad de los 36 personajes de loskualos mos avla el Talmud... mos izyeron pensar... mos izyeron avlar.
