Aktividades de la Komunidad Judiya de Izmir
La Demonstrasion del Grupo de Bayle Shemesh Karmiel
EL 3 Mayo, noche de Shabat, el grupo de bayle Shemesh Karmiel de Estambol, dio una demonstrasion en el salon de konferensia de la Universidad Ege de Izmir. El salon de setesyentas personas estava yeno.
Los mansevos, los viejos, las kreaturas, munchos miembros de la komunidad de Izmir tomaron grande plazer de esta ermoza nochada. Aparte de los bayles i de las korreografias manyifikas, el grupo kanto una kantika en judeo-espanyol, baylaron bayles de los Ashkenazim kon el akompanimiento de la muzika ‘’Fiddler on the Roof’’ i tambien kantaron kantikas en ebreo.
Este grupo de bayle ke partisipa kada anyo a la festividad de bayles en Karmiel, Haifa, el anyo ke pasimos, por la demanda de los organizadores, ajuto a sus programa el Horon, ke es un bayle del folklor Turko.
El Grupo Karmiel de Estambol es konstituado de mansevos de Estambol i de dos mansevos de Izmir. El entuziazmo i la enerjiya de los mansevos reflekto a los espektadores i los izo kantar i baylar kon eyos.
A la fin de la nochada, todos estavan alegres i kontentes i dezeyando la repetision de este modo de nochadas en el futuro.
La Komemorasion del Holokosto en Izmir
La semana ke pasimos komo en todas las komunıdades del mundo entero, la komunidad de Izmir tambien komemoro la pedrita de los sesh miliones de Judios en el Holokosto. Esta nochada triste fue aparejada por el Klub Judio Liga de Izmir, por las dammas Sara Pardo, Myriam Levi i Ester Cen i el Hazan HaKahal Moti Katan? La seremonia empeso kon un momento de silensio por las viktimas del Holokosto. Duspues de la entroduksion de Nisim Teri, sesh Kandelas por los sesh miliones fueron asendidas.?Las mansevas Jinet Sadi, Renin Perez, Ayda Varon i Tina Benezra izieron una presentasion de Barkovizyon muy emuvante, i avlaron sovre el Ghetto de Varsova i los Partisanes? Las dammas Sara Pardo i Ester Cen ke partisiparon a la "March Of Living" en Polonya, les kontaron a los partispantes lo ke vieron i sintieron en Polonya kon el akompanimiento de fotos emuvantes. ?Sukuenta miembros de la komunidad de Izmir partisiparon a esta aktividad, avyendo entre eyos, el Presidente Jak Kaya, los presidentes, los miembros de las ovras de bienfesensya i miembros de la komunidad Judia de Izmir. Remersiamos Moris Saul i Daniel Levi de Izmir, por enformarmos de las aktividades de Izmir.
