El Alhad antes Pesah, 13 Avril... Aviyamos programado de selebrar en famiya esta data partikolara para mozotros. El raporto meteorolojiko afirmando tyempo klaro por fin de semana, a la unanimidad desidimos de azer “brunch” en “Parkorman”. No tengo entisyon de deskrivir lo ke komimos!... No es mi manera de alavar un “buffet avyerto” ke normalmente no tyene nada de orijinal i enteresante para el lektor. Lo ke kero apuntar es el diya ermozo de Primavera, las flores i las vedruras.
Pasar unas kuantas oras kon los ijos, inyetos i serkanos es un plazer bastante grande. İ demas, en un kanton maraviyozo de la natura, debasho el sielo klaro i al bodre de una pisina... Asta akel diya no tuve la okazyon de konoser “Parkorman”. Kon mi inyeta izimoz un chiko torno entre los arvoles de la shara. Tomimos bol, bol oksijen i aver limpyo, akompanyadas kon los kantes de pasharos i de las ojas de los arvoles a kada soplo del ayreziko (esinti)... Fue un “dopping”,porke sigiendo, entrimos en el bulush (telaş) abitual de aparejos de Pesah. El Seder, el ir i vinir, no se komo pasaron los ocho diyas de la Fyesta. Sueto ser ayegados para kada anyo, Amen... İ, ağora, el sigundo Alhad de Mayo, diya de sentimyento, de kerensya, par konsekuensa un diya espesyal. En “El Amaneser”de este mez, el lektor puede meldar mi chiko artikolo sovre este diya. Puedo mizmo dezir ke se selebra de manera kaji ofisyel en syertos paises... Madre... un byervo tan chiko ma, de sinifikasyon tan profunda... Un byervo maraviyozo ke kontyene todo el amor i la kerensya del mundo, esprimyendo sentimyento sin limito de sakrifisyo... Ser madre o sentirse madre, es una partikolaridad ke se topa en la natura de toda mujer. Ya es verdad syertas, biolojikamente no pueden ser madres, ma todas tyenen un lugar en sus korasones para los ninyos, amistad para eyos. El sentimyento maternal, komo lo dishimos, es una partida inseparavle de la” Mujer”... Dishe ke el 2. Alhad de Mayo es un diya espesyal, ma syempre pensi ke es yerro de nombrarlo ansi, komo un diya uniko. Asigun mi todos los diyas deven ser espesyal para los ijos, i no un solo diya en el anyo... La kerensya, la abnegasyon, el devuamyento de una madre son la luz ke nunka se amata. Una luz ke ilumina toda la egzistensya de sus kriaturas, komo lo verash en el egzempyo sigiente. Es otantik, lo sinti i lo vide en un kanal de T.V.
... Una manseva (S..) mueva kazada, durante7 anyos fue kondenada a bivir, atada a la makina de “Dializ”. De mizmo, komo una mala suerte, anyos i anyos i su padre tuvo un destino semejante. Mos estamos ambezando ke su mujer (la madre de S.) abandono la kaza antes 20 anyos i se fue ( o se fuyo) a la Alemanya. El padre de (S.) sintyendose perso, desho a su ija de sava: ”Bushka tu madre, eya sola te puede dar su “rinyon”(böbrek)...” İ ansi fue. La madre vino de Alemanya, i le dyo uno de sus rinyones a su ija... En baldes no disheron muestros ansestros:” La sangre no se aze agua..” Mas imas la de una madre, kualas ke seyan sus faltas o kulpas...
