Vyernes la noche tuve la oportunidad de sigir por azardo, en el posto TV5, la konversasyon de un jornalisto Fransez kon dos byen konosidos intelektuales Israelyanos,a la okazyon de la publikasyon de sus livros respektivos, titolados “Venser Hitler” i “Un Judaizmo umanisto”.
El uno vyejo embashador de Israel en Fransya Elie Barnavi el otro ansyano prezidente del Parlamento Israelyano Avraam Burg.
Avraam Burg kon un chiko kep en la kavesa, Elie Barnavi los kaveyos enteramente destapados.
Dos grandes umanistos de un nivel intelektual superyor, kon en el korason el mizmo dezeo de una “Paz Duravle en Israel”. Todos los dos militantes por un estado permanente de non -belijeransya kon los payizes vezinos.
No pude malorozamente notar todo lo ke fue dicho, no tenia ningun materyal para eskrivir serka de mi ; me esforsi entonses de guadrar en tino dos o tres kestyones del jornalisto i las repuestas ke le fueron dadas.
Vo las transmeto segun lo ke entendi:
Kestyon: Es ke las deklarasyones de eliminar Israel de la karta jeografika, ke vyenen de varios estados del entorno, konstituen una verdadera amenaza?
Repuesta: No ... Israel es bastante fuerte para pueder defenderse... la verdadera amenaza es la ke vyen de aryento .... el problema egzistensyal el mas importante es la estatura moral de Israel en el universo.
El fue el fruto de una nesesidad trajika, el fue kreado sovre el model evropeo de laisizmo ma poko a poko devino relijyozo i mesyaniko; i el ekseso de relijyozidad riska de dividir el puevlo...
Kestyon: Ke se puede azer?
Repuesta: Todo en konservando intakta muesta fey, ser (lo ke eramos al empesijo) un payis demokratiko i laiko, no teokratiko... Renunsyar a la idea del Grande Israel...Ayudar a la kreasyon de un estado Palestinyano kon el kual tenemos el ovligo de bivir en armonia... Negosyar , mizmo kon el Hamas...Ser judyo es konservar su umanizmo, no riskar de azer sufriir ninguno kon muestras aksyones.
Kestyon: Kualo sosh en prioridad Judyos o Israelyanos?
Repuesta de Elie Barnavi: “Israelyano”.
Repuesta de Avraam Burg: Los dos, ma en prioridad “Umano”.
Este chiko rezumen de lo ke oyi vyernes la noche es por seguro byen kurto, ma eventualmente sufizyente para azermos pensar.
Mos demandamos munchas vezes “kualo es lo ke aze la perenidad del puevlo Judyo?”. La repuesta es probablemente:“la diversidad en la unidad “. Una Unidad paradoksalmente sin koezyon aparente, variavle, razgada envezes por eksesos, ma syempre enganchada a un mizmo dezeo, un objetivo i puede ser una kreensa komun.
