La semana pasada selebrimos el dia de las madres en el mundo entero.
Ken es madre? Kualo es la nosyon de madre?
La madre es una egzistensya fantastika ke gole al miskle (güzel kokmak), es un arvole de pasensya (sabır ağacı), es un monumento de fuersa (güç abidesi) ke proteja su marido i sus ijos, es una biva (canlı) ke menaja (idare etmek) a todos en su kaza i en su famiya, es limpya, es ordenada (düzenli); eya abolta todos los echos de su kaza, es una persona ke asigura el ekilibro entre la famiya.
Eya da su kerensya sin asperar nada del den frente. Yena de kerensya es devuada (fedakar), es kultivada, yena de sentimyentos; kuando sus ijos estan tristes yora kon eyos i da el apoyo menesterozo. La madre no kome, aze komer al den frente.
Su dover ez de ser un eskudo (kalkan) kontra todas las negriruras (kötü şeyler).
Es un ancelo ke kere byen syempre al den frente sin dinguna replika (karşılık).
Mizmo si no keremos, eya es syempre allado de mozotros, mizmo ke mos engrandesemos, en su ojo syempre somos kriyaturas. El manko de todo se puede inchir, ma el manko de una madre nunka no se inche.
“MADRE” es la sola persona ke no se puede deskrivir kon los byervos. Kero terminar mi eskrita kon una anekdota ke meldi en una revista i la kero partajar kon vozotros. En un kazal aviya un haham muy espyerto. Miro ke dingunos no estan vinyendo al kal, no estan echando eshkava, no ay bodas i otras okazyones para ganar i mantener. Se fue allado de un ombre buenacho, i le disho:
- Amanyana tyenes meldado de tu padre, ke vengas al kal le echaremos una eshkava.
- Si? Amanyana es? Dakordo......
A la demanyana se fue al kal i lo izo el meldado de su padre.
Paso unos kuantos mezes, los echos del haham estavan aminguados, otra vez se fue allado del buenacho.
- Amanyana tyenes meldado de tu padre, no te olvides de vinir al kal.
- Si? Siguramente mi padre no es, siguro ke lo va azer el meldado.....
A la demanyana se fue al kal i izo el meldado de su padre.
Un mez otro paso i no paso, esta kantika le agrado al haham, yene se fue allado del ombre:
- Mira ke no te olvides amanyana el meldado de tu padre.
El ombre no kito boz, le disho ‘Dakordo’ i a la demanyana se fue al kal i lo izo el meldado.
Despues de un mez el haham esta ves troko kantika, esta ves le disho ke tyene meldado de su madre.
- Si? Meldado de mi madre? Dakordo....
A la demanyana se fue al kal i lo izo el meldado de su madre.
Al otro mez el haham ande peryo la alguja. Otra vez se fue allado del ombre, apenas ke le disho ke tyene meldado de su madre, el ombre le echo un grito en dizyendole;
Aaaa!!!! Ami mirame sinyor haham, loko soz ke mal soz bre?
Si so buenacho, bovo no so!...
No mires ke no me kiti la boz por los meldados de mis padres!!!Padres pueden ser munchos, ma MADRE es solamente una deya...
