Alhad pasado, el shefe de la Republika FransezaNicolas Sarkozy ke tyene la intensyon de ir a Yerushalayim el 22 del mez vinyente, en el solo buto de manifestar su amistad enverso el puevlo Israelyano, asistyo a la selebrasyon de los 60 anyos de la kreasyon de Israel, ke fue organizada en Paris mizmo, sovre la eksplanada del Trocadero.
El Prezidente se rendyo a la fyesta, en kompanyia de Tzipi Livni, ministra de relasyones eksteryores de Israel, ke se topa aktualmente en la kapitala Franseza por el mizmo motivo, i kon la kuala el tuvo una entrevista de una ora.
Segun lo ke dize el kotidyano Fransez Le Figaro, “la prezensya del shefe Fransez en esta fyesta” es un sinyo muy sinyifikativo de la mejoria (düzelme) de las relasyones diplomatikas entre los dos payizes.
En su diskorso, el Mayor de Paris Bertrand Delanoé saludo kon entusyazmo la amistad Franko-Israelyana i anunsyo la kreasyon de una plaza ke sera nombrada “Ben Gourion” el fundador de Israel, i “Theodor Herzl” el teorisyano del Sionizmo.
A su torno, en su avla sovre las buenas relasyones entre los dos Estados, la ministra Franseza Rama Yade insistyo sovre el derecho de Israel de bivir en la Paz i la Seguridad , i de otra parte el derecho de los Palestinyanos de tener un Estado independente.
I kuando el patron de Publicis “Maurice Levi” (ke fue el organizador de esta fyesta) tomo la palavra, el disho: “Me van a demandar deke los Djudyos de Fransya estan selebrando el aniversaryo de la kreasyon de Israel?
Si, semos Fransezes i adoramos muestro payis. Personalmente lucho por su desvelopamyento, ma “una parte en mi” ama Israel ke tyene tanto koraje. Lo amo, mizmo si envezes no so de akordo kon el...kero dezirle ke en 60 anyos de egzistensya, en una situasyon de absensya de Paz, “el” realizo munchas kozas. Espesyalmente en el kampo de la ekonomia i de la syensya, “el” parvino a ser un “Silicon Valley” ande la densidad de bushkadores es superyor a la densidad de California.
