Uno de los sujetos los mas diskutidos esta semana en la prensa oksidental fue i es ainda la nominasyon de Barack Hussein Obama komo kandidato demokrato de las proksimas eleksyones prezidensyales de los Estados Unidos.
La probabilidad ke un "melez" (desendyente de la parte paternal de una famiya preta de orijen Afrikana i de la vanda maternal de una nona blanka ke se kargo de su edukasyon) va ser a la kavesa del mas poderozo governo del mundo, marka un trokamyente inkontestavlemente pozitivo en la mentalidad oksidental.
Malgrado los prejuisyos rasyales enklavados, asta poko tyempo antes, en la kavesa de multiples sitizanos de la Amerika del Norte, “el solo fakto de averlo eskojido para reprezentar uno de los dos grandes partidos de sus payis” es vizivlemente el indisyo de una maraviyoza mutasyon en la manera de pensar i de djuzgar de una grande parte de entre eyos.
Esto, sin dubyo, konstitue un enorme paso verso el entendimyento resiproko entre el Oksidente i el Oriente, un adelantamyento en la bushkida de un avenir manko egosentriko, manko kahotiko i deke no mas omojeno malgrado todo lo ke los separa..
Se puede tambyen dezir ke esta nominasyon realiza un poko el vyejo sonyo Amerikano de ser un “melting-pot” multikultural i de varias kolores, ande elementos umanos, al pareser diferentes, puedran bivir en estado de simbyozis, enrikesyendosen los unos los otros..
Varios editoryalistos politikos estan kaji de akordo en sus analiza sovre esta kandidatura. Segun eyos, rezultado de la unyon de una blanka i de un preto “Barack Hussein Obama "de desendensya paternal Muzulmana ma aktualmente de relijyon diferente, inkarna la posibilidad de un dialogo entre personas de orijenes differentes.
Su nominasyon es bazada djustamente sovre la kompleksidad mizma de su personalidad, komo tambyen sovre su intelijensya briyante i sovre todo sovre la novedad de sus ideas...
En el korason de munchos judyos partikularmente sensibles al problema Israelyano, se topa ainda un resto de ezitasyon, komo un reselo ...el espanto de un muevo orden universal i de una mueva konsepsyon politika del payis ke asta agora fue el mas grande i mizmo, en algunos momentos, el solo protektor de muestro puevlo.
A este propozito devemos notar ke Obama tuvo la impulsyon de empesar el sirkulo de sus vijitas de kandidato ofisyal kon una primera aparisyon en el “American Israel Public Affairs Committee (AIPAC)”.
Segun la Prensa oksidental, el kandidato demokrato deklaro avyertamente ke la seguridad de Israel es sakra i no puede ser el objekto de una kualkyer negosyasyon. El adjunto por seguro ke los Palestinyanos tambyen tyenen menester de un estado en el vezindado immedyato, lo ke les permetera de prosperar. Ma kualas ke sean las negosyasyones kon el puevlo Palestinyano, la identidad Israelyana komo Estado Djudyo, kon frontyeras seguras, rekonosidas i defendivles deve ser prezervada.. Yerushalayim va kedar Kapitala de Israel i deve kedar indivizible”:
“Let me be clear. <Obama said>, Israel’s security is sacrosanct. It is non-negotiable . The Palestinians need a state that is contiguous and cohesive and that allows them to prosper. But any agreement with the Palestinian people mus preserve Israel’s identity as a Jewish state, with secure, recognized and defensible borders. Jerusalem will remain the capital of Israel, and it must remain undivided” he added, in efforts tu secure the Jewish.”
Una chika rektifikasyon fue echa a la ultima fraza de esta deklarasyon, por uno de los propyos kolavoradores de Obama, rektifikasyon segun lakuala desizyones de esta dimensyon puedran ser aplikadas solo despues negosyasyones entre los dos partidos.
Los dias avlaran!....
