Aunke esparzidos en los kuatro kantones del mundo, mirar de rekojer lo ke esta dispersado, preguntar, komunikar, krear en el pluralizmo mizmo de la diversidad djudia "espasyos de entendimyento i de komprensyon resiproka" fue de syempre el destino del puevlo djudyo. Es un poko lo ke aze Naim Güleryüz, perpetual mensajero kultural entre la Turkia i varios otros payizes serkanos o leshamos.
Ansi, es jeografikamente de muy leshos ke el torno la semana pasada, lo ke me pusho a demandarle ke mos konte lo ke izo en este payis ainda no muy konosido por la djente de muestra komunidad...
El aksepto de buena grasya i vo mirar de transmetervos lo ke me konto:
“A la okazyon del kuarenten aniversaryo de la fundasyon del "Sentro de Estudyos Judaikos" (CIJ) en el Departamente de "Filozofia i Syensyas Umanas" de
la Universidad
de Santiago, i sovre la inisyativa de la prezidente Prof. Ana Maria Tapia Adler, una serie de egzibisyones de rekuerdos i fotografias de "
La Vida Djudia
en Turkia" fue organizada en los salones de la grande Biblioteka de Santiago.A esta propozito Naim A. Güleryüz fue invitado a azer una konferensya en lingua Espanyola sovre la "Komunidad Judia de Turkia en su kuinsentenaryo". La assistensya era nombroza: El Embashador Turko en Şili "Osman Ulukan" i su konsorte, la konsejera de Embashada "Çiğdem Tenker Köksal", el Embashador Israelyano "David Kohen", el Dekan de
la Universidad
"Jorge Hidalgo Lehuede" , el Direktor de la biblioteka de Santiago "Gonzalo Oyarzun Sardi", el Parlamenter Şilyano "Dr. Enrique Accorsi Opazo" prezidente de la delegasyon inter- parlementarya Turkia/Şili, numerozos myembros de
la Embashada Turka
i varias personalidades Judias de orijen Turka.
En su avla, muestro amigo traso, en todos su detalyos, un tablo de la vida trankila, sin problemas majores, ke tuvyeron los judyos durante sus 700 anyos de prezensya en Turkia.
El Parlamenter Dr.Accorsi Opazo fue muy impresyonado por la konferensya i demando el teksto ke tyene la intensyon de meldar al seno mizmo del Parlamento i distribuir a los diferentes myembros.
Despues de la konferensya, la ekspozisyon de fotografias i rekuerdos de "
La Vida Judia en Turkia" fue avyerta i kontinuara asta el 26 del mez de Junyo..
Muestro korelijyonaryo tuvo tambyen la okazyon de tomar de muevo la palavra (alora en Judeo-Espanyol) durante un pranso organizado por los Judyos de orijen de Izmir, Menemen, Monastir i el derredor, i tambyen durante varias otras asambleas a las kualas el fue kumbidado.
El tema prinsipal ke el desvelopo fue el pasado i el prezente de la komunidad Judia i la kreasyon del Muzeo del Kuinsentenaryo sovre el kual el ofresyo anchas informasyones a sus oditores.
A esta okazyon, el diskutyo kon
la Prof. Ana
Maria Tapia Adler, sovre el proyekto de la kreasyon de una kolavorasyon entre el "Centro de Estudios Judaicos"de Santiago i el "500 Yıl Vakfı"de Estambul, proyekto ke tyene komo objektivo el desvelopamyento kultural en el kampo de
la Istorya
i de la bushkida de las raizes.
Un lavoro semblavle se diskute tambyen entre la asosyasyon "Centro CIJ" i el "Osmanlı Türk Sefarad Kültürü Araştırma derneği" al sujeto de la lingua i de la muzika Judeo Espanyola.
En el kuadro del mizmo programa: Martes el 10 Junyo, el filmo "Desparate Hours" ke mostra los esforsos de salvasyon ke izyeron los diplomatos Turkos durante la segunda gerra mundyal, fue proyektado. El 12 del mizmo mez "Karen Gerson-Şarhon" avlo sovre el patrimonyo linguistiko Judeo-Espanyol i la muzika Sefaradi.
Segun este mizmo programa el 19 Junyo Ayhan Enginar del ministeryo de los Echos Ajenos de Turkia avlara sovre el sujeto "
La Turkia en la Evropa" i el 26 /6 el Prof. Herman Rodrigues de orijen Turka va prezentar un lavoro para azer konoser los Judyos Turkos ke se topan en Şili...”
Programa muy riko i substansyal al kual partisipan intelektuales de muestra komunidad ke provan ansi un dinamizmo intensivo en el interkambyo de informasyones i partikularmente de esforsos de konosensya i aserkamyento mutual.
No ay dubyo kel rezultado sera briyante i servira de punto de partensya a muevos proyektos syempre performantes en el kampo kultural de muestro puevlo.
