Aktividad mu fruktuoza de la Asosyasyon Sefardi Franseza “Aki Estamos” K.P.
La Asosyasyon Sefardi Franseza “Aki Estamos” esta tomando una amplor de anyo en anyo mas grande i se afirma de una manera muy pozitiva en el kampo kultural i la lucha para el mantenimyento de la lingua i la sivilizasyon sefardies.
Numerozas reunyones kulturales i rekreativas son organizadas kon un programa muy riko, a las kualas partisipan grandes nombres del mundo Judyo.
Segun lo ke me konto mi amiga Norma Anav , en la ultima sesyon a la okazyon de la semana de la kultura Djudia, una “meza redonda” fue organizada a la kuala tomaron parte algunos de muestros korelijyonaryos de orijen Turka, o ke munchos myembros de muestra komunidad konosen byen: “Moshe Shaul”, “Rosy Pinhas Delpech”, “Zelda Ovadya”, “Jean Carasso”, “Maurice Rahmani”, “Haim Vidal Sephiha” i numerozos otros, los kualos avlaron sovre el futuro de la lingua i de las tradisyones del Sefaradizmo”.
El objetivo prinsipal de este valorozo lavoro komunitaryo es de mentener bivo, sin ningun esprito de sektarizmo, el patrimonyo kultural sefardi i de enkorajar la manseves en este kampo afin ke no se pyedran en el olvido tradisyones ke yevan en eyas preseptos de moralidad i de solidaridad umana,los kuakos son partikularmente presyozos en la epoka ande bivimos.
A esta okazyon un filmo sovre lo ke era la Komunidad Djudia de Rhodes fue proyetado kon grande sukseso.
Es una alegria para el Şalom de komunikar semejantes novedades a sus lektores kon el dezeo i la esperansa ke esta ermoza asosyasyon sera syempre performante.
Un filozofo a la kavesa del Djudaizmo Fransezm
Rav. Gilles Bernheim, grande pensador de una kultura rabbinika i tambyen jeneral muy ancha , ombre de refleksyon, reputado por la profundura de sus ideas, presedente Granrabbino del Templo de la Viktorya de Paris, fue nominado a la kavesa del Judaizmo Spiritual i Moral de Fransya.
Mos propozamos de dar proksimamente a muestros lektores mas anchas informasyones sovre su Personalidad i sus opinyones a propozito de algunos sujetos de importansa primordyal.
Difisil desizyon
Alhad el 29 del mez de Junyo, El governo Israelyano tomo la desizyon kon 22 votos pozitivos kontra 3 negativos, de akseptar el troke de 5 prizonaryos libanezos partizanos del Hezbollah kontra los puerpos sin vida de dos soldados djudyos ke avian sido kapturados por las trupas del shefe relijyozo Shiit, en el anyo 2006, en tyerra mizma de Israel, serka de la frontyera libaneza, lo ke avia kavzado una intruzyon Izraelyana ke avia turado 33 dias i echo 160 muertos djudyos i 1200 libanezos.
Los lektores se akodraran la epopea doloroza de estos dos mansevikos a la flor de la edad, la anksyedad mesklada de una falsa esperansa de sus serkanos. Todo avia sido echo en su tyempo para salvarlos; en sus korason todas las madres djudias i nondjudias imploraron los syelos por sus regmisyon ma el destino fue krual.
El troke sera muy dolorozo, las famiyas ya fueron avizadas
Eskrivimos muncho a este sujeto en esta mizma pajina, entonses avia la esperansa... oy los byervos refuzan a venir para ekspresar la amargura ke estamos resentyendo.
