De pasaje por 7 semanas en los Estados Unidos, tuve la okazyon de ver i oir en Washington, una muy interesante prezentasyon audyo-vizual konsernando la China vyeja i moderna, lavoro kompuesto de fotografias echas i komentadas por Maurice Asseo.
Bazandose sovre relatos i analizis echos por grandes historyanos, Maurice Asseo empeso a partir de una epoka antigua de mas de 2000 anyos.
El mos transmete tambyen munchas supozisyones formuladas durante los siglos i inspiradas por diferentes leyendas, algunas konfirmadas, otras ainda en el dubyo.
A un syerto momente, el avlo de la prezensya de Djudyos en este Imperyo ke munchas vezes, malgrado la globalizasyon i las emisyones mas o menos frekuentes en la radyo i la televizyon, parese ainda difisilmente aksesivle a muestra imajinasyon.
Despues de la projeksyon, demandi al autor de ande pudo obtener estas informasyones? El me respondyo ke se bazo sovre el rezultado de diferentes bushkidades i tambyen sovre tekstos de Michael Pollack.
Eyos dizen ke eskritos atestando une prezensya djudia en China desde el ochen siglo fueron deskuvyertos en el Turkestan chinezo; ”un dokumento komersyal Persano eskrito en Ebreo i datado del anyo 718” ansi ke “un pligo de papel kontenyendo una orasyon eskrita en Ebreo” fueron topados en esta parte de la China.
A esta epoka leshana los vijitadores djudyos ayegavan en el Imperyo Chinezo a partir de Babilonya o de Persya, sea por el “kamino de la Seda”, sea tambyen por kamino de mar a partir de Basra.
Egzisten trasas segun las kualas: durante una rebelyon en Kanton en el primer milenaryo de la era Kristyana (probavlemente en 878/79) munchos estranjeros fueron masakrados, entre los kualos Muzulmanos i Djudyos.
Se topo tambyen trasas de pyedras tumbales en “Kaifeng” (Bien Lang) atestando una prezensya djudia en este lugar i la konstruksyon de una sinagoga en 1163.
Mas tadre, a la epoka de la invazyon mongol de Kublai Khan en el siglo 13, viajadores, tal Marko Polo o Jakobo de Ankona confirmaron la prezensya de komunidades djudias importantes al interyor de la China komo tambyen en diferentes portos de este immenso payiz.
Egzite igualmente vestijyos de tres dekretos :El uno, datado del anyo 1329, impozando una taksa a los ke praktikanvan una relijyon monoteísta (Djudyos, Kristyanos i Muzulmanos) . Un otro de 1340, prohibyendo (interdizyendo) el “Levirato” .I enfin un treser de 1354 yamando Djudyos i Muzulmanos a engajarsen en la Armada Imperyal.
Ma, revineremos i mos esforsaremos (mas o menos) de konsentrar muestra atensyon sovre los djudyos de Kaifeng debasho la Dinastia Sung.
Inskripsyones en Chinezo i Ebreo, datadas de los anyos 1489 , 1512 , 1663 i 1669 konfirman la prezensya konstante de una komunidad Djudia en Kaifeng en el mueven siglo i tambyen la konstruksyon de una sinagoga de la kuala “maketas” egzisten en el Muzeo Bet Hatefoutsot de Telaviv I en el Muzeo de Arte Djudyo de Paris etc….
En efekto, en el siglo 9, durante la Dinastia Sung, alora en estado de dekadensya , el Emperador de Kaifeng invito un grupo de 1000 Djudyos Persanos, en el buto de aktivar la filature i la tintura del algodon.
La komunidad Djudia de este lugar ayego al punto el mas alto i alkanso el shifro de 5000 personas, durante la Dinastia Ming entre 1368 i 1644.
Afin de pueder identifikarlos, un emperador Ming avia mizmo dekretado ke los Djudyos puedian yevar solamente uno de los syete nombres sigyentes: “Ai”, “Gao”, “Jin”, “Li”, “Shi”, “Zhang” i “Zhao”.
Otras provas de la prezensya Djudia en China provyenen de misyonaryos Kristyanos tal Matteo Ricci en el anyo 1605. A su torno en 1722 el misyonaryo Jean Domenge konstato un alto grado de asimilassyon de los djudyos a los uzos del payiz, komo la sinagoga ke paresia muncho a un templo Chinezo i se nombrava “El Templo de la Pureza i de la Verdad.
Semejantes informasyones se arrestaron malorozamente en 1724, kuando el Emperador Yong Zheng prohibyo el prozelitizmo Kristyano. Ansi asta la fin del dyeziochen siglo , no uvo ningun kontakto kon la China.
Se save solo ke a la sigida de la asimilasyon djudia a las kostumbres chinezas, la komunidad de Kaifeng desparesyo en el dyezimueven siglo; la sinagoga fue destruida durante una terrivle inundasyon, lo ke no impedyo munchos myembros de kontinuar a praktikar el uzo de la Birka Mila i de observar syertas reglas de limpyeza propyas al djudaizmo. Malgrado esto, desgrasyadamente, por kavza de grande provedad, los Sefer Thoras fueron vendidos a misyonaryos protestantes. Oy en dia, eyos se topan en la Biblioteka “Klau” de la Hebrew Union College de Cincinnati.
Al pareser, aktualmente, ay ainda en esta parte de la China entre 200 a 300 djudyos ke malorozamente se konosen a penas los unos los otros,
De vez en kuando, el pasaje de un turisto ke se enteresa a esta kestyon aze mas o menos rebivir este grupo pedrido . Kaji ningun vijitador no manka de ir a la kaleja del sud para ver la plaka ande se topa eskrito “South Jiao Jing Lane”, inskripsyon ke indika i atestigua la prezensya pasada de la famoza Sinagoga.
En Pesah, los djudyos de Kaifeng tenian el uzo de pintar el montante de la puerta de entrada de sus moradas, kon una tintura echa de un poko de agua mesklada a la sangre de un gayo inmolado en sinyo de kapara. Eyos tambyen azian pasteles sin levadura . I de mezmo tenian la kostumbre de ayunar 4 vezes al mez .
Estranyo destino del Puevlo Djudyo , kaji syempre en estado de migrasyon, deshando trasas de su pasaje en los lugares los mas leshanos del mundo, riko de eksperyensa i de una ancha vizyon del universo, algunas vezes maltratado o byen molestado , ma tambyen en diferentes sirkustansyas, prezente en los puntos kulminantes del progreso i del adelantamyento de la umanidad…
