Ay de esto dos semanas, Henri Ruso serro su ojos por syempre. Ombre de grande moralidad i de edukasyon perfekta, amorozo de poezia, partikularmente franseza, el era el desendyente de una de estas vyejas famiyas djudias del tyempo pasado ke supyeron guadrar en kada sirkunstansya el kudyo de una kondukta impekavle. Kaji syempre kalmo, delikado en su komportamyento komo en sus palavras, el no manko nunka de ser un ombre muy dinyo.
Aunke perfektamente asimilado a la evolusyon de la epoka prezente, el mos avlava munchas vezes, kon nostaljia, de los anyos de su manseves i de las valores ke la dominavan.
A su mujer “Lote” muestra kerida amiga a “Marsel” muestro muy apresyado kolaborador ansi ke a su ermuera i a su inyeta luz de sus ultimos anyos, la ekspresyon de muestra tristeza i de muestra grande amistad.
