“Limmud” es un festival de kultura ke se organizo en 23/11/2008 en la eskola “Ulus Musevi Lisesi” en Estambol.Es el kuatren anyo ke se esta organizando en una manera perfekta; en reushendo a trayer personas, profesores de grande valor, emportantes en sus espasyos i dando la emportansa menesteroza a todos los detalyos.
La sinyifikasyon de “Limmud”; es ambezar, estudyar.
El buto es; ambezar kon la partisipasyon de la persona i, dar la okazyon de developar muestra identitad. Limmud; ambeza a los partisipantes a partajar la konosensya, sin asperar nada del den frente.
Developa la identitad djudiya i arrezya (güçlendirmek) la kultura. Es una kollektividad de estudyo.
Shabat la noche; despues de un kokteyl; dos mansevos izyeron un diskorso de avyertura (açılış konuşması) en turko i en ingles, presentando los ke van a avlar. El primer era; “Dr.Guy Bechor”; un mansevo espesyalisto de stratejiya i diplomasiya de İsrael. Un profesor konosido, avlo en ingles; dando a entender la politika i la situasyon del Moyen-Oryente kon una lingua koryente (akıcı), i fasil a suivar. El sigundo “Padre Patrick Desbois”; un papaz katoliko enteresado de serka de los djudyos; por kavza ke su granpapa fue egzilado a la Ukrania; i el se entereso a las komunitades djudiyas i developo sus relasyones kon eyos. El esta investigando (araştırmak), kon su ekipa; las tombas arrekojidas (toplu mezar) en el oksidente de la Ukranya; i esta konversando kon los testiguos (tanık) de las matansinas (katliam). Personaje tanto emportante ke fue publikado en el kapak de la revista “TİME”.
En el anyo 2007; el organizo un sempozyum entitulado: “La Shoah en la Ukranya” por la primera ves, i tuvo un sukseso grande.
En 2008; el gano el premyo (ödül) de “Simon Wiesenthal”.
Lo ke mos konto, mos adolensyo (kahretmek). Lo ke pasaron, los djudyos de la Ukranya, i la manera ke los mataron mos izo espantar de pensar; komo una persona puede ser tanto kruel i sin piadad!... El komporto de los almanes a los djudyos era bestyal (hayvansal).
Komo todo el mundo kedo kayado, i komo en la Russia todo se elimino i no kedo una trasa de este shoah!....
Un umanisto, una persona onoravle i konsiderado, tyene komo misyon de topar todas las tombas de los djudyos; kon kondisyones muy difisiles.
Veramente; el Dyo ke le de muncho bueno i fuersa para pueder kontinuar este lavoro.
Alhad demanyana uvo; una “Savor de Boca”, ke se prezento por syete mujeres i un ombre. El buto era de pueder azer kontinuar muestra lingua muy presyoza el “ladino – djudeo-espanyol”.
“Un viaje inolvidavle a muestra erensya”. Un kamino de leche i miel a lo pasado.
Fue un diskorso de nostaljiya; kada uno i uno konto la manera de bivir de los djudyos antes kuarenta, sinkuenta anyos; kon los esnafikos, los echos ke se aziya akel tyempo, kon las tradisyones; komo kazamientos, brit-millas, kon las komidas, kon las adas, kon los lugares ande biviyan los djudyos, la djuderia ke era “LA KULA”; kon los proverbos, dichas i refranes i los desenes (çizim).
Todo fue kontado de una manera umoristiko (mizahi), en azyendo bivir a la asistensya akel tyempo, kon el dekor i las vistimyentas de los ke darsaron (konuşmacı). Despues partisipi a una konferensya intitulada :
“La Vida del Lavoro en la Turkiya i las Valores ke se estan Enaltesyendo”; (Türkiyede iş hayatı ve yükselen Trendler); ke el dirijente fue “Avi Alkaş” i izo avlar tres mansevos i una manseva. Eyos avlaron de los faktores ke son emportantes para ser reushidos en los lavoros.
Si la shans es emportante u no. Komo kale valorizar las okazyones.
“Kale apresyar las eksperyensas, el buto de la persona es emportante, las relasyones kon los otros tyenen un lugar en el sentro, kale kreyer i utilizar estas relasyones.La kapachitad es; de utilizar las relasyones menesterozas kon la shans endjuntos. La alma de la ekipa (takım ruhu) djuga un rolo emportante para la reushitad. Kale meter su korason al echo i kale konsantrarse al buto. Kreyar una diferensya en echando tino a los detalyos. Kritikarse de si para si, para pueder alkansar al perfekto.
Abstenerse (çekinmek) de azer yerros. Lo emportante es; de apersivirse de los yerros.
Oy ay una kriza ekonomika en el mundo entero .
Kale dar la atansyon al resultado de esta kriza.Porke a la fin de esta kriza; absolutamente va ver una elevasyon en los echos.
La persona deve de perfeksyonarse en todo modo punto de vista. Por konkorensyar (rekabet) kale ser kreativos (yaratıcı).
Mos va mos a edukar muncho, i va mos a kreyer una diferensya. Lo ke es el prensipal; es de topar la konosensya; de edukarmos enriva de este espasyo i devinir diferentes de los otros”.
Los sinko mansevos ke diskorsaron eran muy enstruisados i intelijentes. Eyos avlaron i a la fin dyeron todas las repuestas menesterozas.
El Profesor “Soner Çağatay” avlo de la identitad djudiya i los turkos; en empesando de los anyos 1920, kon dokumentos de las arshivas del governo.
El Limmud se termino kon ”Soli Özel” ke izo una analiza del mundo despues de las eleksyones (seçim) de la Amerika.
Avlo en los espasyos; ekonomikos, politikos, de munchas personas ke fueron echados de sus lavoros i ke no tyenen echos. Lo ke se esta asperando de “Obama”.
“Lo ke es emportante por la Amerika i el mundo entero es ke ; uno de sangre mesklada (melez), un nero (siyahi) fue eskojido komo Presidente. La administrasyon mueva va tomar desizyones muevas.
450.000 personas peryeron sus echos. La regula de la konstitusyon (anayasal düzen), deve de restorarse.
El grupo ke dyo apoyo (desteklemek) en primero a Obama fue; los blankos edukados de la klasa esnafiko (orta halli).
Esto es un punto muy emportante.
Yo penso; ke en la perioda vinidera; las relasyones entre la Amerika i la Turkiya se va developar, porke los dos paises tyenen menester uno del otro.
Despues de Bush; el mundo se va formar de muevo.
Si va mos a pueder pasar esta perioda kritika sin violensya (şiddet); las relasyones van a ser buenas kon İsrael; la Turkiya va ser syempre un ekilibro enfrente de İran”.
Soli Özel termino su avla kon repuestas a las kestyones ke le demandaron.
Fue un diya yeno de saveduria (bilgi), byen organizado, kon muncha djente i muy reushido. Kero felisitar a todos los ke lavoraron de alma i korason, kon grande veluntad para esta grande organizasyon.
Fueron kapaches i muy mitikulozos (özenli) para elijir (seçmek); los profesores etranjeros envitados; para resivirlos i okuparsen 3-4 dias kon eyos fina sus partensyas.
