de konferensyas echas por el “Embashador Mustafa Akşin” i “Naim Güleryüz” en diferentes sivdades de USA
El Embashador Mustafa Akşin (aktualmente retirado) i Naim Güleryüz Prezidente del "500 Yıl Vakfı" partisiparon a una serie de konferensyas en el kuadro de un programa elaborado por varias organizasyones, en diferentes sivdades de los Estados Unidos: “Detroit”, “New-York”, “Westchester”, “Boca Raton”...
Un myembro de la Asosyasyon AFTJ (American Friends of Turkish Jewry) de New York kon el kual tuve personalmente kontakto me konto el immenso sukseso ke obtuvyeron estas intervensyones serka de un publiko muy nombrozo.
El Embashador Mustafa Akşın avlo sovre las relasyones entre la Turkia , Los Estados Unidos ansi ke Israel i las analizo del punto de vista istoriko .El afirmo la importansya para la Turkia de una aliansa vyeja de 60 anyos kon la super potensya Amerikana, malgrado las chikas fluktuasyones ke intervenyeron a varios periodes.
De su parte Naim Güleryüz konto la larga prezensya djudia vyeja de 700 anyos en el İmperyo Otomano i la Republika Turka, en metyendo en relieve la facha umanista i umanitarya de la Turkia enverso los sitizanos djudyos, los kualos no se konsideraron kaji nunka komo una simple minorita, ma komo una parte integralmente atada al puevlo Turko. La prova es sus indefektivle apego a sus payis de nasimyento mizmo kuando se topan en varios otros payizes.
En Detroit," Nurten Ural" Prezidente del ATAA Türk Amerikan Dernekleri Birliği i en mizmo tyempo Konsolo onoraryo Turko, deklaro ke semejantes reunyones krean la posibilidad de pueder aklarar en todos sus detalyos las buenas relasyones entre Turkos i Djudyos.
De mezmo en New York, en la ermoza nochada organizada por la "IUMEZUSA" (Istanbul Üniversitesi Mezunları Derneği), delantre mas de 250 oditores, el Konsolo Jeneral de Turkia "Mehmet Samsar" afirmo ke durante el periodo ke va de los tyempos del Imperyo Otomano asta la Turkia moderna ande una grande variedad de kulturas se enkontran en una atmosfera de armonia, los djudyos kon sus ombres de echo, sus akademisyanos i sus artistos azen parte de la istorya del payis.
A su torno el Vice konsolo Israelyano en New-York Benjamim Krasna konfirmo ke la Turkia fue syempre un refujyo para sus korelijyonaryos. El adjunto tambyen ke las relasyones entre La Turkia i Israel son syempre serkanas las unas de las otras i ke los raportos estratejikos entre los Estados Unidos, Israel i la Turkia son muy util para todas las tres partes.
A un gazetero ke le demando el objekto de la dicha reunyon, Mustafa Akşin respondyo ke es djustamente para dar la posibilidad a los djudyos de Turkia de kontar esta situasyon a los Amerikanos i partikularmente a los djudyos Amerikanos.El adjunto "komo lo savesh los djudyos Amerikanos son bastante poderozos i eyos syempre mos ayudaron en varias sirkunstansyas".
A una otra pregunta konsernando el apoyo a la Turkia de la parte de la kolektividad djudia de los Estados Unidos, konsernando la kestyon Ermenia, Naim Güleryüz deklaro ke los myembros de konfesyon djudia del kongreso lucharon muncho en favor de la Turkia i ke personalmente el pensa ke este apoyo kontinuara syempre. El adjunto tambyen ke semejantes desizyones no apartyenen a los Parlamentaryos ma a los İstoryanos. Personas ke no konosen los detalyos de este kavzo no pueden pronunsyarsen sovre baza de konsiderasyones politikas o sentimyentos personales.
De su parte,Mustafa Akşin disho: "Es posivle ke a la okazyon de una eleksyon, varias promesas fueron pronunsyadas, ma los Estados Unidos ya konosen la importansya i el pezgo de la Turkia, es porke no kreo ke kualkyer trokamyento sera echo."
Durante las reunyones organizadas de la parte de la AJC en las Sinagogas Beit-Tora de Westchester i Beit Israel de Boca Raton, endjuntos kon la Asosyasyon "Florida Anadolu Derneği" ande el publiko era kompuesto de Muzulmanos i Djudyos, el Ambashador Mustafa Akşin i muestro amigo Naim Güleryüz respondyeron tambyen a varias kestyones de la asistensya.
A la pregunta si la Turkia esta ansyoza al sujeto del programa nukleer del Iran , el diplomato Turko disho ke por seguro este sujeto inkyeta la Turkia ma ke eya tyene la esperansa ke esta enerjia sera utilizada unikamente en un objetivo pasifiko, ma ke en ningun kavzo eya permetra la utilizasyon de una arma nukleer en el Oriente Medyo.
Keridos lektores, mos sentimos el dever de partajar kon vozotros el relato de este ermozo lavoro de informasyon i aklarasyon realizado por la diplomasia Turka...
