La terror chapteo de muevo myerkoles pasado, kruelment, salvajemente, sin piadad ni entendimyento.
Eya chapteo sin ningun motivo admisivle, por razones ke paresen venir de las profonduras eskuras de un mundo animal. Eya chapteo pushada por un odyo ataviko, kaji una obsesyon irrepresivle kontra la sivilizasyon i la luz.. Tres fueron sus objetivos: “el refuzo del adelantamyento i de la prosperidad”, “el aborresimyento por kualkyer otra etnia ke la suya”, “el odyo irrepresivle enverso el Judaizmo”.
No se trata de un akto de revolta ni de revendikasyon ma unikamente de “refuzo del otro”, ken ke sea este otro, vyejo, ninyo , ombre o mujer... El krimen por el krimen, lo ke fatalmente ayega a un estado de negasyon de todo modo de valor umana.
Djudyos provablemente en estado de orasyon fueron matados en el asalto del sentro “Beit Shabad” de Bombay .Entre eyos "Rabbi Gabi and Rivki Holtzberg” amigos de Rav. Mendy Chitrick ke se topa aktualmente en muestra komunidad i al kual prezentamos kon grande tristeza muestras sinseras kondolensas i la ekspresyon de muestra profunda afliksyon...
A la sigida del terrivle drama, Alhad pasado durante la reunyon del Konsilyo governomental , el Primer Ministro de Israel Ehud Olmert disho ke “el odyo enverso los djudyos esta pushando a perpetrar aktos kriminales de violensa”. El izo la promesa ke Israel azera todo su possivle para defender las institusyones djudias en ke lugar del mundo ke se topen...
Es ke el ombre se ambezara un dia a ser realmente umano enverso los otros? İ no mas (komo dizen los savyos) un lovo para el ombre..
