Ombres relijyozos Muzulmanos i Djudyos en sus esforsos de konstruir la Paz
Imames ansi ke Rabbinos por la mas parte orijinaryos de los Territoryos Palestinyanos i de Israel ansi ke de varios otros payizes komo Ayifto, Iran, Turkia, Estados Unidos, Arabia Saudita, Rusia, Siria ets… partisiparan del 15 al 17 del mez koryente a la grande Konferensya Internasyonal organizada en los lokales de la Unesco de Paris, kon el objetivo de inisyar muevos aktos ke puedran asegurar la paz en el Oriente Medyo.
Segun un bulletin de esta mizma Institusyon, ke muestra amiga Norma Anav tuvo la amabilidad de mandarmos, fueron tambyen invitados a asistir: Ali Bardakoğlu Prezidente del Departamento de los Echos Relijyozos de Turkia, Mustafa Çagrıcı Mufti de Istambol, ansi ke Rav Izak Haleva Gran Rabbino de Turkia.
Fueron tambyen kombidados a la Sesyon de Avyertura: Sheik Mohammed Hussein Mufti de Yerushalayim, Rav Shlomo Amar Gran Rabbino Sefardi de Israel, Monseigneur Vingt-Trois de Paris, Gilles Bernheim Gran Rabbino de Fransya, Mohammed Moussaoui Prezidente del kulto Muzulmano en Fransya.
Segun el programa de esta reunyon , una deklarasyon final sera adoptada a la fin de la sesyon i prezentada a la Prensa.
La Galeria Almelek fyesta su venten aniversaryo
Ermozo destino kel de la famiya Almelek en su totalidad, famiya de intelektuales ennamorados de arte , literatura i muzika… famiya no solo de eskritores i artistos ma tambyen de mesenes kudyozos de meter en relieve i de azer konoser las ovras de sus semblables.
Ansi ,a la okazyon de este venten kumpleanyos de su galeria, eya organiza en el Harbiye Askeri Müzesi, una ekspozisyon de lavoros artistikos, ke sera avyerta del 20 asta el 31 desembre.
Muestras felisitasyones las mas kalorozas a la famiya Almelek a la kuala auguramos de syempre ser konsernada por semejantes aktividades en el kampo de la kultura i del adelantamyento.
Seremonia de Tefilin de Yoni Pinto
Djuevez el 4 del mez koryente fue selebrada la seremonia de Tefilin de Yoni Pinto ijo de Megi & Benjamin Pinto i inyeto de Ceni Kohen ansi ke de Eti & Bension Pinto prezidente onoraryo de muestra komunidad.
Ombre de buena ventura ke el sea syempre , poderozo i provechozo komo lo son sus djenitores i sus avuelos.
I todas muestras felisitasyones i muestros dezeos de alegria a las famiyas Kohen i Pinto.
