Todos los umanos nasen libres i iguales en dinyidad i derechos.
Kada persona tyene derecho a la vida, a la libertad i a la seguridad.
Ninguno sera detenido en esklavaje ni en estado de servidumbre.
Ninguno sera sometido a la tortura ni a un tratamyento inumano o desgradante.
Todos son iguales delantre la ley i la djustisya.
Niguno puede ser arbitraryamente akulpado sin ser prealablemente oido de una manera djusta i ekitavle.
(artikolos de la deklarasyon de los derechos del ombre)
Klara PERAHYA
Ay de esto sesenta anyos, despues de la segunda gerra mundyal i de la salvajeria de la Shoa, el 10 del mez de Desembre 1948 “la Deklarasyon Universal de los Derechos del Ombre” elaborada i redaktada por René Cassin i sus kolavoradores, fue sinyada debasho la prezidensya de Eleonor Roosvelt
La semana pasada, a la mizma data, este evenemento eksepsyonal fue fyestado en varios payizes... una komemorasyon tyene kaji syempre un efekto pozitivo, eya es antes de todo un akodro i mos alesha por un tyempo del immovilizmo de muestro egosentrizmo.
Es ke una koza troko en el universo a la sigida de la promulgasyon de este dokumente de una valor inigualavle? Por seguro si.
Aunke munchos kantones del mundo kedaron ainda enterrados en las tinyevlas, munchos otros ayegaron a un estado de kaji transparensya.
Es verdad ke munchos puevlos persisten syempre a bivir en el "aborresimyento del otro" i ansi en la indjustisya i el espanto, por kontra ay tambyen los ke azen un esforso de aserkamyento.
Mizmo las grandes potensyas oksidentales ke desde largos siglos pretenden aver ayegado al punto kulminante de la sivilizasyon, metyeron muncho tyempo asta entender ke no puede aver verdadero adelantamyento si los ke se topan en el apreto no ayegan eyos tambyen a un nivel de vida normal.
Esto dicho, no puedemos nyegar ke realmente una koza troko... Oy en dia, mizmo en los lugares los mas aislados , munchos ombres i mujeres tomaron konsensya de sus propyos derechos i sovre todo del menester de azer eyos mizmos un esforso para salir de la inersia syega del fatalizmo.
Por seguro ay ainda konfliktos relijyozos, inegualidades entre las personas, syempre los mizmos abuzos, syempre la mizma deskonfiansa los unos enverso los otros. Antes, estos faktos kedavan la mas parte del tyempo eskondidos, oy grasyas a la libertad de ekspresyon i a una mas grande eskolarizasyon eyos son munchas vezes denunsyados.
Oy, asosyasyones umanitaryas ayudan a luchar kontra la opresyon, la ambre, la penuria de produktos de karakter vital i sovre todo kontra la umilyasyon...i esto sin tener komo objetivo un kualkyer motivo relijyozo.
Oy egziste el derecho de intervensyon dela ONU en kual payis ke sea, si una parte de la populasyon esta en reziko de jenosidyo o de simple inegualidad.
“La Deklarasyon Universal de los Derechos del Ombre” no es por seguro un instrumento majiko kapavle de reglar todos los problemas, eya es una referansya, un punto de apoyo en la lucha para un mundo mas umano.
Malgrado el dezorden aktual , los eksesos, las krizas monetaryas komo morales, devemos achetar ke munchos poderozos empesaron enfin a entender ke un mundo ande egziste "la dominasyon absoluta de los unos sovre los otros" no es mas posivle. I de sus parte, los ke son oprimidos no solo, komo dicho mas ariva, tomaron konsensya de sus derechos ma tambyen se ambezaron a remangarsen las mangas i entrar en la lucha, la kavesa alta i el braso tendido.
