Alhad pasado el 28 del mez de Desembre, meldi en el kotidyano elektroniko fransez “Le Monde”, un artikolo de su korespondyente en los Estados Unidos, ke me izo muncho pensar.
El sujeto de la eskrita era el aktual i kaji universal drama del eskandalo finansaryo de Bernard Madoff.
Komo mo lo dize el autor del artikolo i komo ya lo avia eskrito el Şalom de la semana pasada en sus pajinas en lingua Turka, munchas asosyasyones karitativas djudias fueron mortalmente ferridas en esta trajedia, i entre otras la “Fundasyon Elie Wiesel para la Umanidad”.
Martes el 25 Desembre, esta mizma sosyedad formulo el sigyente komunikado de prensa: “Kon grande tristeza vos informamos ser, entre munchas otras, una de las viktimas del mas grande rovo de la Istorya”.
La fundasyon Elie Wiesel tenia 15,2 milyones de dollares debasho la jerensya de Bernard Madoff.
De mezmo ke el fondo del grande eskritor djudyo, munchas otras asosyasyones umanitaryas Djudias Amerikanas, aktivas en los sektores eskolaryos, universitaryos, kulturales, sanitaryos, ayudo a los handikapados i a los ke se topan en la mizerya ets.. pedrieron la totalidad o una partida de sus fondos en el drama " Bernard Madoff". Entre eyas, la asosyasyon karitativa de Steven Spielberg.
Segun Gary Tobin, Prezidente de la İnstitusyon de İnvestigasyon Komunitarya Djudia de San-Fransisco, el volumen annual de las donasyones ke resiven estas asosyasyones karitativas suve asta 5 milyardas de dollares, de los kualos los 20% son versados a organizasyones Israelyanas.
La parte ke se topava debasho la jerensya de Bernard Madoff es ainda deskonosida ma en todo kavzo eya es muy importante.
Esta situasyon mas ke aflijente para el puevlo djudyo el mizmo no empide ke numerozas misivas negasyonistas, eskupyendo kada una su odyo i su angustya, sean mandadas mizmo en los Estados Unidos.
Segun Abraham Foxman, Prezidente de la Liga por la Defensa Judia “J:D.L”, olas de komentaryos antisemitos se espandyeron en la Amerika del Norte, desde el eskandalo Madoff.
Si, estranyo destino kel destino del puevlo djudyo... danyado el mizmo en su ovra la mas sakra “el ayudo umanitaryo”, el deve tambyen soportar la ira i la sanya de miles de negasyonistos ke tyenen komo solo objetivo de ferrirlo en sus entranyas las mas profundas “su kodigo etiko”.
Un individuo djudyo peko , ninguno lo nyega, ma ke kulpan los otros? Deke syempre, mizmo envezes de la parte de personas de un alto nivel kultural, este menester de destruir personas kon las kualas no tyenen ningun kontakto i ke puede ser mizmo no konosen?
I syempre la mizma kestyon ke repetamos i repetamos ...Deke este aborresimyento ansestral, syego, inumano en su persistensya, transmetido de djenerasyon a djenerasyon a traves el tyempo?.
Pregunta sin repuesta imperyoza responsabilidad para el puevlo djudyo; “La salvaguardya de la misyon etika transmetida eya, desde los tyempos leshanos de muestros primeros avuelos.
