La prensa internasyonal esta aktualmente yena de komentaryos terrivlemente negativos al sujeto del komporto (konsiderado inumano) del Estado de Israel.
Es verdad ke la muerte de siviles i de ninyos inosentes mos azen todos yorar... todos partajamos la dolor de las madres i de los padres ke pyedren sus ijos o ijas, de ke edad ke sean, todos yoramos a la vista de ruinas ke eran, en el pasado, nidos de amor i de kerensya.
Numerozas manifestasyones de protestasyon son organizadas en el mundo entero i esto es komprensivle. Ma antes de djuzgar, antes de kulpabilizar, es imperativamente nesesaryo de konoser en toda su realidad la kavza verdadera de esta situasyon.
Una analiz muy interesante a este sujeto fue publikada en la muy seryoza i imparsyal revista “Le point”del 8/1/2009, debasho la sinyatura de Bernard Henri Levy.
Vos do en breve un rezumido de lo ke mos dize el filozofo:
“Por seguro esto terrivlemente impresyonado por las fotografias de ninyos i siviles Palestinyanos ke fueron matados. Ma, tomando en konsiderasyon las olas de odyo ke soplan kontra Israel en la prensa internasyonal, kero relevar unos kuantos puntos:
1)Ningun governo en el mundo otro ke Israel no akseptara de ver miles de roketas kaer sovre sus sivdades durante tantos anyos... El verdadero sujeto de sorpreza no es la brutalidad del governo Israelyano, ma su larga pasensya.
2)El fakto ke los “Kassames” del Hamas i aktualmente sus misiles Grad provokaron tan pokas muertes no sinyifika ke eyos son inofensivos ma ke los Israelyanos se protejan i biven kon grande frekuensa en los mahsenes de sus moradas.
3) Por kontra, el fakto ke las armas Israelyanas azen tantas viktimas no es la konsekuensa de la voluntad de Israel ma de los dirijentes de Gaza ke eskojeron de ekspozar sus populasyon sivil komo eskudos (kalkan) umanos.
4)Entre el komporto de los unos i de los otros ay una immensa diferensya. Los Palestinyanos del Hamas travan sovre sivdades, dunke sovre la populasyon sivil, lo ke segun las leyes del Derecho Internasyonal se yama “krimen de gerra”.
Los Israelyanos vizan objektivos militaryos i azen (kontra sus voluntad) danyos siviles, lo ke se yama “danyos kolaterales (yanal)”.
5) No mos olvidaremos el fakto sigyente, uniko en kualkyer kampo de gerra. Tsahal tuvo el kudyo de syempre prevenir la populasyon de Gaza ke mora serka de los objektivos vizados, afin ke se meta al abrigo.
Por seguro esto no amengua el karakter trajiko de la situasyon, ma es un punto ke todos deven saver.
6) Konsernando los ruıdos ke un blokeo integral fue aplikado de la parte del governo Israelyano a la populasyon ambyerta de Gaza.... esto no es egzakto ..los konvoyos umanitaryos no kedaron de pasar, asta el dia del asalto terreste, en el punto de pasaje “KEREM SHALOM” . Ainda el 2 del mez koryente 90 Kamyones de komanya i de produktos farmasetikos pudyeron (segun el New York Time) entrar en el territoryo de Gaza (fin de sitasyon)
