El 17 del mez koryente, despues la fin de Shabat, el kabineto de seguridad del Estado Israelyano tomo la rezolusyon de una interrupsyon unilateral de las ostilidades de Gaza, a la sola kondisyon kel “Hamas” no trave sovre las fuersas djudia. Ehud Olmert afirmo kel governo Israelyano pudo alkansar sus objetivos i ke la kapachita del Hamas de travar sovre Israel es aktualmente muy limitada
Nombrozos kapos del Hamas ke se topan aktualmente en egzilyo ripostaron i deklararon ke esta interrupsyon del kombate no sera respektada si Israel no opera el retrakto kompleto de su armada. De su parte, Mahmoud Abbas disho ke la desizyon de Israel devra ser sigida por un akordo de paz formal i tambyen de un retiro del Tsahal.
Este primer paso verso la paz es por seguro ainda muy ezitante, frajil, sometido a numerozos akontesimyentos i parsyalmente a la influensa ke la prensa Internasyonal tendra de agora adelantre sovre la opinyon universal.
Eya se mostro mas ke parsyal en sus relatos konsernando las batalyas; munchos kotidyanos i tambyen sites de Televisyon de varios payizes oksidentales tuvyeron un komporto mas ke tendensyozo, algunos pusharon mizmo el esprito de parsyalidad asta mostrar fotografias falsas.
Si... Vimos en la prensa internasyonal fotografias verdaderas o enganyozas de provenensya Palestinyana i Araba ke mos izyeron realmente yorar, las mas terrivles fueron mostradas munchas vezes, sin kel redaktor del artikolo tenga la idea de asegurarse de sus otentisidad i sin darse el tyempo de la refleksyon ni bushkar las razones fundamentales ke pusho Israel a atakar.
Si... “La libertad de opinyon i de ekspresyon” egziste i deve syempre egzistir, eya es klaramente estipulada en la deklarasyon de los derechos del ombre, ma kale tambyen saver ke kada derecho komporta a su torno un dever “el dever de dezir la verdad integral i no una verdad parsyal”.
El vente i unyen (21) siglo es el siglo del ekseso... ayegimos a un grado de tensyon nyervoza i de avidita de byenes materyeles ke lo bastante nos es mas sufizyente, mos olvidimos lo ke los fransezes yaman “la djusta mezura”... Una fuersa loka parese pushar el ombre a ir asta el ekstremo limite de las kozas.
Fue ansi en ke parte del mundo ke sea... Manifestasyones terrivles de odyo enverso el puevlo israelyano i mizmo enverso el simple sitizano djudyo kontinuan ainda. Veremos kuando se van a arrestar.
Una esperansa parese ainda persistir, i esto en el korason de kada ombre: “La investitura de Barack Obama”. Es ke el puedra tener la fuersa de azer kayar los gritos de aborresimyento i azer amenguar la injustisya i el fanatizmo? Los dias vinyentes responderan.
