Diya de Alhad, miles de personas koryeron al Mall Park National en Washington, para pueder ver de serka el muevo prezidente i para asistir al konserto de dos oras, organizado por selebrar la inogurasion de Barack Obama.
El puevlo empesaron a reunirsen de demanyana temprano, a lo largo de las pisinas, reflektando el monumento de Abraham Lincoln (el prezidente ke libero los esklavos), i el lugar de ande Martin Luther King prononso su famozo deskorso ‘I Have a Dream’ (Tengo un Esuenyo). El park estava yeno de kameras de televizion i de gazeteros.
Munchos muzikos, aktores i sportistos partisiparon al konserto ‘We Are One’ (Todos Somos Uno). Los muzikos kantaron viejas kantikas konosidas por el puevlo entero.
Ma, la mas grande estreya del diya fue Obama, ke se asento en un lado kon su famiya i kon el vice-prezidente, Joseph Biden Jr. Obama va djurar diya de Martes, komo el Prezidente de la kuarenta i kuatrena administrasion, i el primer Afrikano-Amerikano Prezidente de los Estados Unidos.
En el empesijo del konserto, Bruce Springteen kanto kantikas kon un koro de gospel. Mas duspues, kantaron Mary J.Blige, James Taylor, John Legend, John Mellercamp, Beyonce, Bono, Bruce Springsteen, Shakira i Steve Wonder. Tom Hank sitio unas kuantas palavras de Lincoln i el vice-prezidente avlo sovre los lavorantes de la Amerika.
El puevlo, kantando, baylando, aplodisando, i gritando sloganes, embiyaron a Obama sus mesajes de esperansa i de trokamiento en los Estados Unidos. Estos diyas ke el pais esta pasando la mas grande kriza ekonomika, i ensima de todo, kon las gerras en İrak, Afganistan i en el Medio Oriente, no solo la Amerika, ma mezmo el mundo entero, estan asperando munchas muevas solusiones del muevo prezidente.
Diya de Martes, la seremonia de inogurasion se va azer en el edifisio de Captolio en Washington. Obama i sus kolaboratores pasaron los dos mezes dalkavo, lavorando para ganar la konfiensa del puevlo, i para topar remedios al puevlo ke kederon sin lavoro duspues de la kriza ekonomika. Obama tiene projektos para pueder krear tres miliones postos de lavoro, i ansi, pueder salvar la ekonomika de la kriza. El, tambien, prometio al puevlo de eskapar la gerra en İrak, de ekspandir las fuersas kontra los Talibanes en Afganistan i tambien, de topar remedios de pas entre İsrael i los militanes de Hamas en Gazza.
El setentisiete por sien de los djudios de los Estados Unidos, votaron por Obama en las eleksiones. Eyos estan tan siguro ke Obama va estar siempre de la parte de İsrael, i ke el va penar por sus profitos, ke lo estan yamando ‘El Prezidente de los Djudios’. Todos estomos rogando ke no se trompen.
En los mezes dalkavo, Obama se estuvo kayado en los problemas enternasionales, i no se kijo mesklarse a las desiziones de Bush.
Todos tenemos la esperansa ke Obama va topar remedios a las gerras, i va mobilizar su administrasion de vista, para okuparsen de los problemas del mundo entero.
Diya de Lunes, Obama endjuntos kon el ex-sekretario, Colin Powell, izyeron una emision nasional al puevlo: ‘Vos Esto Yamando al Servisio’. Obama yamo el pais entero a unirsen para solver los problemas diferentes i gravos.
En su deskorso de Martes tambien, Obama va azer una demanda, de mas muncha responsabilidad i de esfuersos ekonomikos, no solo al governo, ma tambien a los lideres finanserios del pais.
En una entrevista kon CNN, Obama disho ke el va azer todo su posivle, para garantizar ke el puevlo veyga egzaktamente, komo sus kontribusiones pagadas al governo (vergi,) se estan gastando.
A lo ke oyimos fin oy, Obama tiene muy buenas entisiones, i kere ke todo seyga ‘transparante. Esperamos ke el no se olvida las palavras ke dio, i ke pueda reushir de prokurar la pas en el Medio Oriente, i ke pueda fondar buenas relasiones entre los paizes.
