El destino chapteo de muevo myerkoles el 2/7 en uno de los lugares los mas sentrales de Yerushalayim, komo una fatalidad inegzorable, destruidera del mas chiko esforso de abutir a una situasyon si no de paz real ma a lo manko de posibilidad de respirar... malorozamente de la parte adversya, syempre este menester de azer sufriir, komo una egzijensya de vengansa asedada (susamış) de sangre...
Myerkoles, sovre la avenida Jaffa de la kapitala, un palestinyano morador de un foburgo relativamente kalmo a mayoridad araba, padre de 3 ninyos,eskupyo su aborresimyento sovre personas ke no le avian echo ningun mal; asentado a la direksyon de su traktor, el asalto pasantes anonimos, sembrando ansi la muerte, asta ke un ofisyer Israelyano trave sovre el afin de meter fin al karnaje.
Tres personas toparon la muerte i numerozas fueron ferridas, bilanso trajiko, pezgado en su karga de dolyo i lagrimas.
De muevo la inkyetud i el espanto ...de muevo el marido o el ijo ke salyo la demanyana de kaza para no retornar mas nunka, de muevo en kada madre, este arranko de korason irrepresivle por 3 minutos de retardo de un ijo o una ija ke tadran a venir.
Ke sera la reaksyon del puevlo djudyo al pareser asinyalado a nunka tener repozo?
Es ke el matador apartyene a una organizasyon terrorista o byen es ke el kometyo su akto en un momento de lokura? No se puedra puede ser nunka saver esto, ni entender realmente el motivo verdadero del djesto kriminal.
Aunke no se pudo ainda estableser formalmente el verdadero motivo de este akto, el ministro de la defensa Israelyana “Ehud Barak” dyo el orden de derrokar la kaza de los paryentes de Husam Dwayat otor del atentato ,en mizmo tyempo ke la de los paryentes del terroristo Ali Abu Dliam ke avia el tambyen matado 8 seminaristos relijyozos en Yerushalayim, en el mez de marso.
Todo en rekonosyendo las dimensyones trajikas del akto, el vezindado i los serkanos de la famiya de Husam Dwayat, se opozaron kon insistensya a la destruksyon de la morada de los paryentes, pretendyendo ke se tratava de un akto de lokura o puede ser mizmo de un simple aksidente.
Uno de entre eyos disho kel matador estuvo mesklado a un problema de droga, lo ke okazyono una muy fuerte presyon de la parte de la polisia Israelyana sovre el, i konto tambyen ke el avia tenido relasyones de amor kon una manseva djudia de lakuala tuvo mizmo un ninyo.
El diaryo elektroniko Jerusalem-Post mos ambeza ke esta mizma manseva deklaro a una gazeta Israelyana ke “en efekto eya tuvo kon el otor del atentato una relasyon de 5 anyos i un ninyo ke el rekonesyo sin pena.”
Segun eya, su asalto kriminal de myerkoles pasado no fue kavzado por motivos de ektremizmo, el no aborresyo nunka los djudyos. “La prova es ke estuvo kon mi” disho la manseva.
El problema era ke el fumava varyas drogas, lo ke lo rendia abuzivo, motivo por el kual eya se avia topado en el ovligo de romper las relasyones.
Por kontra el ofisyer Israelyano ke fue ovligado de travar myerkoles sovre el matador, lo oyo dezir antes de murir “Allahu Akbar” palavras ke malorozamente devinyeron un djenero de moto de los terroristos.
Komo syempre una pregunta espunta en muestro meoyo, a la kuala es realmente muy difisil de responder:
De una parte ”la djustisya mos dize ke son solos los ke perpetran un akto kriminal ke deven pagar (ni el padre pagara por la kulpa del ijo, ni el ijo plor la del padre)”. De la otra, “esta desizyon de derrokar las kazas de los jenitores del matador (la kuala desizyon fue anunsyada ay de esto muncho tyempo) es puede ser uno de los raros medyos de meter fin a los inyovles aktos de terrorizmo ke son prezentados por los fanatikos komo aktos de onor i relijyozidad”.
