Un paseo a Edirne
Antes un mes tuvimos el grande plazer de azer un paseo kon 50 mujeres volontaryas de una asosyasyon a EDİRNE ke era la kapitala del Emperyo Ottomano fina la konkuista (fetih) de Estambol en 1453.
Una sivdad yena de ermozuras naturales i una istorya enteresante...
Mos topimos a las syete de la demanyana, el otobus grande mos estava asperando kon dos kapitanes.
La risivida de las organizatrises de este dia reushido; era koza de ver...
Tanto kayente, el buenos dias, vinido bueno i klaro dicho de aryento del korason de las dirijentes; izo naser una relasyon de amigable i de ermandad entre todas las dammas ke vinyeron a pasear.
A penas mos suvimos al otobus, mos sirvyeron kafes kon dulsuryas i salados, los tratamyentos no se eskaparon fina arivar a esta sivdad ke no era konosida por dingunos de entre mozotros.
La superfisiya de esta sivdad es
6276 km
.; ke este espasyo kontyene (kapsar) el 8% de toda
la Turkiya.
En la antikitad (ilkçağ); Edirne se fondyo kon el nombre de Hadrianopolis. Aki era en el treser siglo; una fortifikasyon militar (askeri istihkam).
En la sivdad aviya; templos (mabetler), un edifisyo de huente monumental (anıtsal çeşme binası), statuas (heykel), i fabrikas de armas.
Edirne fue kaji 90 anyos la kapitala de los turkos ottomanos (osmanlı türkleri).
Kuando Estambol se izo la kapitala; Edirne fue enserklada (kuşatılmış) por munchos paises visinos.
En 1913 Atatürk el grande salvador de
la Turkiya
vino aki i izo reunyones por salvar diferentes lugares del pais i se kedo 10 dias.
Los edifisyos de las eskolas son una istorya.
Despues del grande fuego, los djudyos ke aviyan fondado las eskolas djudiyas aki; aparteniyan a la organizasyon “ Alliance İsraélite”; ke se aviya fondado en Paris.
Fina 1940 esta eskola dyo enstruksyon komo eskola, despues la transformaron a un ospital. İ a la fin empeso a dar edukasyon komo una eskola turka.
Los giadores (rehber) un marido i mujer, mos yevaron en primero; a un simeteryo i monumento (anıt) de ŞÜKRÜ PASHA ke era un eroe (kahraman) de defensa (savunma). Edirne fue defendida 5 mezes kon este eroe kontra los enemigos i por esta kavza le dyeron el nombre de defendedor de Edirne (Edirne Müdafii).
Despues mos fuimos a la frontyera de Pazar Kule ke se pasa de aya a la Gresya. Una rejyon tampon (tampon bölge) de 3 metros, ke apartyene a los dos paises : Turkiya i Gresya. De aya vimos el kamino de treno vyejo kon el edifisyo de la istasyon de treno.
La universita (Trakya Üniversitesi) de esta sivdad, merko este edifisyo, la restoro i ampeso a empleyarla por los servisyos de los rektores (rektör).
Lo mas enteresante para mi fue el monumento de Lozan (Lozan Anıtı) ke es el rezumen (özet) de la gerra de liberasyon (Kurtuluş Savaşı).
Este monumento se fondyo en el anyo 1998, i es formada de tres kolonas (sütun) altas.
La altura de la primera kolona es 36.5 metros i semboliza la Anatoliya(Anadolu).
La altura de la sigunda es 32 metros, i semboliza la rejyon Trakya.
La tresera 18 metros ke es el sembol de Karaağaç ke es una maale (mahalle) a 4 kilometros de Edirne; enserklada de una vejetasyon (bitki örtüsü) natural i una istorya enteresante.
El mantenimyento de Karaağaç era la vendida de la produksyon de vinos (şarap imalatı).
En medyo de estas tres kolonas; un serklo (çember) de beton, i en medyo de este serklo una figura de una manseva grasyoza i muy fina; una palomba (güvercin) en la mano de la manseva ke semboliza la pas i la demokrasiya; en la otra mano el dokumento (belge) sembolizando el akordo de Lozan (Lozan Antlaşması).
Este monumento es el orgolyo de Edirne ke se esta vijitando por munchos turkos i turistos.
El komer de midi fue en una guerta enriva del rio de Meriç; un lugar yeno de arvoles i rozas, los pasharos kantando, la kolor vedre del rio, el derredor (ortam) kalmo ke estava dando repozo a todos.
Entremyentes, en kada meza 10 mujeres avlando, riyendo i komyendo kon grande savor , en respirando el oksijen i mirando la vista kalma, mos repozimos bastante antes de bever el kafe i kontinuar a kaminar para vijitar otros lugares enteresantes.
Keridos lektores; va kontinuar la semana venidera a kontar lo ke vijitimos despues de midi.
a kontinuar...
