El onze de Julio, PAJA (Pan Afrikano Judio Aliansa) selebro su primera reunion kon los partisipantes de las komunidades judias de Uganda, Zimbabwe, Nigeria, Etopia, Ghana, Kenia i Los Estados Unidos. Los reprezantantes de las komunidades judias de Afrika se reunieron en Uganda, para selebrar la enstalasion del Rabino Gershom Sizomu, por los rabis konservativos de Los Estados Unidos, komo Grande Rabino de la Komunidad.
‘’Es una grande onor por mozotros de azer la primera reunion de PAJA en Uganda’’ esta dizyendo el Grande Rabino Sizomu. ‘’Estomos kreendo ke PAJA va azer su posivle por ke todas las komunidades judias de Afrika se enfuerteskan. PAJA esta lavorando para unir las komunidades Afrikanas Judias. PAJA tambien esta mirando a enfuerteser las koneksiones entre los judios de Afrika i los judios en el mundo entero, para reushir a krear ‘’La Unidad Judia Mondial’’.
Esta organizasion es la ovra de Be’chol Lashon. Be’chol Lashon, ke signifika ‘’En Kada Lingua’’ en ebreo, es un empesijo del Instituto de los Judios i de la Investigasion de las Komunidades Judias. Su dover es de kreser, enfuerteser los puevlos judios de todas las etnikas, kulturas i rasas. El direktor de Be’chol Lashon, Diane Tobin, esta diziendo ke tienen grande potansiel por el kresamiento de komunidades judias en Uganda, Nijeria i los otros paizes de Afrika.
Los direktores de PAJA estan partisipando a munchas aktividades en sus komunidades. Dr. Rabson Wuriga esto eskriviendo un livro sovre las tradisiones orales de los judios de Afrika. El Grande Rabino Gershom Sizamu esta establisando una mueva Eskola Rabinika en Uganda para servir a todos los judios de Afrika. Otros judios estan establisando Sinagogas, eskolas i otros projektos.
PAJA se ekspandio en el Atlantiko entero, para atar los Judios Afrikanos kon los judios pretos de los Estados Unidos. Por la primera vez en la historia, los lideres de los Judios Afrikanos se estan reuniendo. Esto va ser una grande ovra historika.
Una grande diversidad de puevlos judios egziste en el mundo entero. Los kazamientos miksos, la konversion i la adopsion son la kavza de esta diversidad. Anyos antes, kuando mos diziyan ke este Afrikano es judio, no mos kreiamos. Ma oy, egziste judios de todas las rasas. Ay grandes esfuersos en el mundo entero, para pueder krear ‘’Una Unidad Judia Mondial''. Rogamos ke esto se realize para pueder luchar kon muestros enemigos.
