“The Golden Cross International Singing Festival”
‘’The Golden Cross Singing Festival’’ es un evenemiento kultural ke se selebra kada anyo en Gozo, Victoria, Malta. El objektivo prensipal de este festival es de ofrir una oportunidad a los kantadores lokal, de kompetir kon los kantadores etranjeros. La tema de este festival es ‘’Pas i amistad a trver la muzika i los artes’’.
Este anyo, la sinken edision de este festival tomo lugar entre el 19 i 24 de Julio en la ‘’Citadella Center for Culture and the Arts’’. Un juri enternasional distribuo diferentes premios a las mijores kantikas. La kreativitad i el talento son los aspektos prensipales de esta eleksion.
La isla de Malta es un paradizo situado leshos del kaos del mundo moderno, en las aguas kayentes de la Mediteranea. Kada anyo, kantadores se dirijan a este paradizo, para partisipar a este festival. El Festival del Kante no es solo una selebrasion del talento endividual i de la enerjia kreativa, ma es, tambien, el testimonio ke los artes kreativos konduizan a la amistad i la pas entre los paizes.
Este anyo, muestra amiga, la kompozitora Fani Hodara reprezanto la Turkiya. La kantika ‘’Alone’’, kompozada por Fani Hodara, los biervos eskritos por Figen Cakmak i kantada por la solista Miray Tezsay, gano el ‘’Grand Prix’’ del festival.
Fani Hodara partisipo a munchos festivales i izo ganar munchos premios a la Turkiya.. En el anyo 2002, su kantika ‘’Leylaklar Soldu Kalbimde’’ reprezanto la Turkiya en el ‘Eurovision Song Contest’’.
Oguramos a Fani Hodara la kontinuasion de sus asiertos.
