Aslan I. Palachi
Oganyo, el 17 en festival de filmos judios de Vancouver avre sus puertas kon "La Novia Siryana" del rijidor Eral Riklis una koproduksion franseza/Alemana/İsraelyana. El festival mundial de filmos de Montreal otorga el prestijyozo premyo "Grand Prix of The Americas Award" a esta ovra en lakual se avla el Ivrit, fransez, Arabo, Inglez i Ruso. La komunidad Druz, una minoridad Araba no muzulmana, pasifika, kon una populasyon de 18 mil personas, bive en la Siriai las Alturas de Golan okupada por Israel desde 1967. De vez en kuando los Druzes se enkontran en la frentera gritando mesajes de una parte a la otra. Algunos de eyos detechiden mizmo kazarsen. Ma, es una romansa trajika si pasan de un pais al otro.Filmado en Golan, "
La Novia Siryana " es sovre una impresyonante istorya de fronteras fizikas i emosyonales i la veluntad ke se kyere para kruazarlas. El dia de la boda de Mona es el mas triste dia de su vida. Eya save ke una vez ke pasa la frentera entre Israel i Siria para kazarse kon un primo ke no konose, un artisto famozo Druz Siryano de la TV, Mona nunka otra vez sera permetida tornar a su kerida famiya en Majdel Shams, el mas grande kazal Druz en las Alturas de Golan. Los espektadores kyeren verla kazada, ma tambien ke se kede kon su famiya. Ma la frontera, invizivle en el peizaje, impide de azer todo los dos.La eskritora de los dialogos del filmo i kaji todos los aktores son pallestinyanos. Malgrado esta kolavorasyon, entre Israel yanos i palestinyanos, el argumento del filmo eksplora el konflikto del Medio Oriente a traverso las vidas frakturadas por la rigoroza realidad politika de una komunidad divizada. En su deskripsyon de la situasyon, "
La Novia Siryana " reflekta una de estas trajedias umanas detras del konflikto politiko. El rijidor Eran Riklis no esta de akordo kon dingunas partidas ke se pelean i mos amostra la absurdita del konflikto. Puede ser ke la partisipasyon de la eskritora palestinyana Suha Arraf salvo el filmo de la trampa de propaganda i mos dio una mirada de serka a las estrukturas patriarkal de la sosyeta Araba. El rezultado es un drama divertyente i emosyonante.Si ay esperansa para sanar las feridas de esta rejyon, filmos komo "
La Novia Siryana " nos puede ayudar a yegar este buto.
13/07/2005
