ke Israelyanos i Palestinyanos tengan un dia, el koraje de enfrentar el pasado” (Daniel Barenboim)
La semana pasada meldi en el kotidyano fransez “le monde” el rezultado de una entevista ke la djornalista Raphaelle Bacqué tuvo kon Daniel Barenboim, grande pianisto i shefe de Orchestra de muestra epoka, Israelyano, orijinaryo de Argentina, profundamente djudyo en sus aktos komo en su manera de pensar, aunke terrivlemente kritiko i puede ser egzajeramente severo enverso su propyo payis.
Testigo de la perversidad del antesimitizmo, kontra el kual tuvo a luchar en su payis de nasimyento, facha kon facha, desde su chikes, kon el odyo i el menospresyo, el fue syempre konsiyente de su dover de Djudyo de afirmarse no solo en tanto ke muzisyano, ma tambyen en tanto ke konsensya umana, de su dover de kombatir kontra la injustisya en ke kampo ke seya, asta ir envezes muy leshos en su intransijensya..
Kon las preguntas provokantes de la gazetera i las repuestas kategotikas kaji sekas del grande muzisyano, el artikolo en kestyon desha el lektor pensativle, kaji perplekso. Kritika de los suyos muy amarga, ande se syente la bushkida de la “verdadera verdad” sin nunka transijar..
Ay inkontestavlemente en la ‘egzijensa de pureza’ de Barenboim, un amor infayivle enverso su puevlo i en mizmo tyempo una severidad inkondisyonal, komo la ekspresyon de un orgolyo superyor ke reklama de los suyos una perfeksyon absoluta i una estrikta fidelidad enverso los preseptos de moralidad ke fueron una de las bazas de su kreensa.
Dos puevlos igualmente aharvados por el destino, viktimas de una fatalidad ke los alesha el uno del otro, ma los aserka por la similitud de sus situasyon de ombres arrondjados .
El eskopo de Barenboim es de romper el sirkolo visyozo ande eyos se topan enserrados... Kon muncho idealizmo i tambyen koraje (komo lo avia echo anteryoramente Yehudi Menhim) el formo un orkestra de adolesentes Arabos i Israelyanos, kon la esperansa ke otros grupos, en otros kampos de aktividad, se formaran tambyen, lo ke ya es el kavzo aktualmente en la Medikeria i el Espor ... lavorar endjuntos los ojos tornados verso la mizmas direksyon es por seguro una de las raras possibilidades de aserkamyento.
I puede ser ke, poko a poko, lo ke los diskorsos politikos, los konsilyos internasyonales i los esforsos de las grandes potensyas no pudyeron azer , la simple kolavorasyon de unos kuantos artistos, ombres de sensya i mizmo simples ovreros, lo puedra.
Es ke un dia los ombres se ambezaran a bivir komo ermanos en este kantoniko del mundo, el uno al lado del otro?
Eske la solidaridad puedra ser mas fuerte kel interes o el orgolyo?
Es ke muestra mirada sovre las kozas sera mas djusta i mas verdadera?
Es ke la amistad puedra remplasar el odyo? el enemigo devenir amigo? i la utopia realidad ?
Es ke un dia vamos a tener el koraje de ir mas leshos ke este djenero de “oto-sufizensya” ke es una de muestras karakteristikas, afin de ayegar a un estado de paz ke se enrezyara den dia en dia mas?
Es ke amar realmente es syempre alavar i bushkar lo ke flata muestra vanidad?
