Remarki una estranya kontradiksyon entre mis artikolos de esta semana. En la oja “Kavram” de muestro jurnal, esto tratando de “Amor”, romantismo ets... Par kontra en estas linyas ke vash a meldar, es el aspekto negativo de una unyon: el divorsyo. Lo ke puedo dizir es ke seya el uno, seya el otro, son la realidad de la vida. De mas en mas, estamos testigos de separasyones, de divorsyos. Konsiderando d’este punto de vista, se entyende mas bueno, la importansa de la peryoda de “ezpozados,” ke es determinante sovre el avenir de los mansevos. Se konosen eyos i las famiyas, sus modo de bivir ets…Ya es verdad ke ay una palavra, un angajamyento. Ma, es mas fasil, menos dolorozo de kitar la “varyeta” en ezpozados, ke despues de kazar.. Seya en muestra komunidad, o en otras, espesyalmente, en las muevas jenerasyones, se esta vyendo munchos kazamyentos derrokarsen. No puedemos saver todas las razones. Antes de todo, la manseves aktuala no kere bushkar remedyos para no dezazer el nido. Mi opinyon es, la manera moderna de edukasyon, las fasilidades ekonomikas i otras, ke los djenitores estan konosyendo a sus ijos deven djugar un rolo importante. Espesyalmente las ijas, no estan syempre topando en el kazamyento, la vida ke estavan auzadas. Siguro ay i otros faktores, komo el dezeo de “independensya ekonomika” de la mujer por egzempyo… No kero jeneralizar. A la kontra, oy en munchas unyones “orozas,” lavoran marido i mujer para luchar mano kon mano. “En munchos kazamyentos los syete primeros anyos, son anyos de deziluzyon i pasensya. El 15en anyo es kritik. Si se reushe a pasarlo sin sar i sin mal, ay fuerte probabilidad de kontinuar...” Esto no lo dishe yo, ma un psikoterapisto. Asigun la ley sivil, el divorsyo se realiza solamente kon la sentensya del djuzgador. Alora, empesa una peryoda difisil: partaje de los byenes (materyal), i malorozamente el avenir de las kriaturas. Es inkreivle komo dos personas ke se kijeron, bivyeron endjuntos pueden devenir enemigos!… Orozamente, todos no se komportan ansi. Lo mas atristante, es la gerra ke dan para ganar el derecho de tutor (çocuğun velayeti). Malgrado kavzos ke se arranjan de manera mas o menos sivilizada, es en verdad una peryoda de stress. Ay mas demaziya diskusyones, ke entendimyento i toleransya. Porke, seya el padre seya la madre, keren tomar este derecho. Las leyes sovre el derecho familyal, toman en konsiderasyon, los avantajes de las kriaturas, en determinando el derecho de tutor. Para pueder tomar una dechizyon djusta, se aze bushkidad sovre la personalidad, edad, el modo de bivir ets.., de los djenitores. Los muy chikos nesesitando kudyo maternal, kedan en jeneral, kon la madre. Los divorsados en vezes se arranjan amigavlamante, no traen limito al ver las kriaturas, en evitandoles ansi, mas abatimyentos. Ansi los chikos ne kedan en pozisyon de eskojer, o mas egzaktamente, de preferar al padre o la madre. El problema prinsipal i importante asta agora era este derecho de tutor. Entonses, la importansa troko de objekto. Kon el estado aktual de la mueva “Ley Sivila”, al pareser la prioridad se esta dando al materyalismo.. A la eksepsyon de algunos kavzos, es el partaje de los byenes imobiliaryos (mülkler) ke esta enteresando agora, mas muncho ke las kriaturas. Si el divorsyo es inevitavle, no ay senso de atrazarlo, afilu por el “ hatır” de los chikos. Una situasyon desagradavle ma, tambyen una realidad de la vida, komo el kazamyento.
