El Sentro kultural de la Sinagoga Hesed le Avraam de Büyükada fue inogurado kon grande entuzyasmo Juevez la tadre el 14 del mez koryente
Resumen en Jud.Esp.del artikolo de Nelly Barokas
El Sentro kultural de la Sinagoga Hesed le Avraam de Büyükada fue inogurado kon grande entuzyasmo Juevez la tadre el 14 del mez koryente, kon la partisipasyon del Koro de Simon Kohen i en prezensya del Gran Rabino Rav Isak Haleva i su konsorte Rabanit Rejina Haleva, ansi ke del Kaymakan de las Islas el onoravle Mevlut Kurban, del Shefe de la Munisipalidad Sn. Coşkun Özden i su konsorte, del Prezidente de la Komunidad Djudia Silvyo Ovadya i su konsorte i tambyen de varyos konsultantes del Gran Rabinato.
Despues de la seremonia de kortadura de la kordela, durante la kuala se izo el İstoriko de la Keila Hesed Le Avraam, el prezidente de la fundasyon de la Sinagoga, el Sinyor Lazar Yakar tomo la palavra i afirmo ke este sentro kultural sera polivalente i renforsera la frekuentasyon del Kaal, a las oras de orasyon.
Rav Moşe Benveniste de su parte konfirmo ke este ermozo evento enrikesera la vida.
El prezentador de la seremonia Rafi Habib deklaro, el, ke es a la sigida de largos esforsos ke esta presyoza realizasyon pudo ver el dia.
El Prezidente onorifiko de la komunidad, el Sn. Bension Pinto, el kual fue invitado sovre la shena para la distribusyon de plaketas, izo un chiko speech para manifestar su kontentez i evoko la memorya de los ke sirvyeron esta keila kon fidelidad i asiduidad, komo los Gabayim Albert Kasuto, Jak Ruso, Şaul Kapeluto i tambyen el hazan Maçorro. El fue sigido por el Prezidente de la munisipalidad “Adalar Belediye Başkanı Sayın Çoşkun Özden” ke ekspreso su alegria de ver ke una semejante realizasyon akontesyo durante su mandato.
El Prezidente de muestra Komunidad Silvyo Ovadya manifesto su kontentez i afirmo ke la sinagoga ke el, asta este dia, konsiderava ser bastante grande i espasyoza, le paresyo en vyendo la grande afluensa de djente, de dimensyon kaji insufizente. El tambyen izo el elojyo de los Sinyores Kurtuluş Morhayim i Lazar Yakar Levi por sus lavoro i sus fidelidad.
A su torno, el onoravle Adalar Kaymakamı el Sn. Mevlut Kurban disho muy djustamente kel Arte mos salva de munchas malas tendensyas i ke el fakto ke kada komunidad puede ekspozar libremente su kultura es un grande enrikesimyento para las Islas Simon Cohen i su koro ansi ke David Sevi enkantaron la asistensya kon sus kantes yiddish i sefardi.
İ un otro muy ermozo momento fue kuando Rav Moşe Benveniste i Rav Mendy Chitrik kantaron endjuntos.
