La semana pasada un chiko evento rebolteo la komunidad Djudia de Fransya. En Paris mizmo, en el dyezimueven distrikto, "T-shirtes" kon la inskripsyon en lengua almana: “Juden eintritt in die Parkanlagen verboten” (entrada del park prohibida a los djudyos) estavan avyertamente en vendida.
Munchos mansevos (konsernados o no por el problema djudyo) lo yevavan; algunos puede ser inkonsyentes del oprobo ke esta inskripsyon reprezenta, otros por kontra, al pareser intensyonalmente, en vista de manifestar klaramente sus aborresimyento enverso los djudyos .
Un pasante remarko por azardo la botika ande se vendian estos T shirtes i alerto immedyatamente el BNVCA (Buro Nasyonal de Vijilensya Kontra el Antisemitizmo), el kual intervino al punto kontra el merkader .
Aunke politikamente i ekonomikamente en estado de regreso kontinual, la Fransya es uno de los payizes de ande parten munchos koryentes de refleksyon filozofika i sosyo-politika.... No mos olvidaremos tambyen ke, kompuesta de 800.000 myembros, la komunidad Djudia Franseza, rika de pensadores i ombres de sensya de grande valor, es de leshos la mas grande entre todas las de los otros payizes de la Evropa.
El fakto en kestyon es por seguro banal, ma no puedemos impedirmos de sentir komo un pelishko en la boka del korason, un sensasyon estranya de triste sorpreza ke mos pika en lo mas profundo de muestro "ser".
Una kestyon mos vyene al tino, kaji syempre la mizma, oskura, insoluble: “deke? ”.
Deke en la kalor voluptuoza de estos ermozos mezes de enverano ande todo predispoza al repozo, gozo i plazeres fizikos, estos kaji periodikos sinyos de malkerensya? Deke kontinualmente esta resurjensa del antisemitizmo? .
I komo syempre azemos muestra abitual introspeksyon personal. “Ke pudimos azer para mereser un semejante odyo?
De la parte adversa, en el kavzo prezente, no se puede tratar de un simple sentimyento de revolta kontra las inegualidades del destino, ni de la ekspresyon de un instinto salvaje de selo, injustifyable en las sirkustansyas aktuales; el baryo (mahalle) ande se produzyo el evento no es uno de los mas rikos i los djudyos ke moran aya no son de los mas poderozos.
Malgrado los perpetuales esforsos ke son echos para erradikarlo, ay muncho mas ke 20
siglos ke kon una asiduidad puede ser unika en la İstorya de la umanidad, este odyo persiste a manifestarse enverso el puevlo Djudyo, chiko punyado de mujeres i ombres esparzidos en el espasyo universal.
Es djustamente esta permanensya del aborresimyento ke es sorprendente, sovre todo oy en dia, a una epoka ande todo se topa en perpetual trokamyento i ande la eskala de valores troka en el espasyo de un minuto, lo ke mos pusha envezes a demandarmos (de una manera por seguro enteramente illojika) si el antisemitizmo no esta eskrito en el kodigo jenetiko umano.
La razon verdadera es por seguro diferente i se topa probablemente en mozotros... puede ser en el fakto ke, kon razon o sin razon, desde los tyempos mesyanikos, sintyendose kargado de un misyon etika a transmeter de jenerasyon a jenerasyon a la posteridad, el puevlo Djudyo konservo syempre una manera de pensar i mizmo de bivir ke lo desferensya de los otros.
