Los Djudios orijinaryos de la Espanya, pudyeron guadrar sus uzos, kostumbres, malgrado las penas, sufriensas i sekanas ke enkontraron en el korso de los siglos. En grande parte reusheron a konservar el trezoro uniko de kuentos, kantes populares, ke transmetyeron oralmente de jenerasyon en jenerasyon. Kon tyempo, los kuentos i los ritmos melodiozos del Kastelyano evoluaron en un lenguaje Judeo-Espanyol. Ekspulsados de la Espanya en 1492, los Sefaradis se estableseron en las tyerras Otomanas i en otros paises, komo el Norte de la Afrika ets...
Konservaron kon amor, kon selo la lingua, los kantes, las tradisyones malgrado los anyos i las distansyas. La idioma ke avlavan en Espanya kon tyempo tomo terminos i byervos del derredor, empleados en la vida kotidyana, la Kultura i la Literatura. Kon sus formas rikas, kuando poetikas, su variedad, el Judeo-Espanyol no tadro a ser tambyen la lingua de la Muzika de los Sefaradis del Mediterraneo Oriental. Es una importante partida de muestra Kultura.
En diversas okazyones eskrivimos al sujeto de esta Muzika ke sintimos kon plazer i un poko de nostaljiya. Tenemos solistos i grupos interpretandola kon maestriya, ke izyeron fama en la Diaspora, ansi ke en muestra rejyon. Me parese ke ya los konosemos, sin tener menester de sitarlos uno por uno... Ma, kero mensyonar tambyen, i otro aspekto de la Muzika Djudia: “El Klezmer,” sin apartener portanto, a la Muzika J-Espanyola. En el presipyo del XIX. Siglo (o mas antes) en los gettos de la Evropa Sentral, se ampeso a formar grupos de muzika folklorika, tenyendo un riko repertoryo de kantes en “Yiddish”. Esta muzika, espesyalmente, de fyestas (bodas, bar-mitzvas) de los Djudios Ashkenaz, se emplea tambyen i en las Sinagogas. Aktualmente, en los Estados Unidos, ay nombrozos grupos de “Klezmerim.”
(*) Djusto aki kero avlar del famozo Neil Sedaka, kantador amerikano de orijen Sefarad: “ Neil en su “Bar-Mitzva” meldo tan ermozo la Aftara, ke en la Sinagoga, no uvo uno sin lagrimas de emosyon. Tanto ke las otoridades relijyozas, disheron ke Neil pudriya devenir un buen “Hazan”... Neil, Sefarad de vanda paternal, fue portanto influensado de la Muzika Yiddish. İ kon el eskopo de ayudar materyalmente el Teatro Yiddish, dyo konser de Klezmer, en el renomado “Carnegie Hall...”
El instrumento fundamental de esta muzika es la klarineta. Despues se adjusto el violon, la gitara, el kontrbas ets... Esta muzika, de vez en kuando, se esta empleando tambyen i en las bodas o otras fyestas de Sefaradis. Yo en Israel, las sinti en dos, tres okazyones, estas melodiyas de klarineta en fyestas muestras. Aki, kero mensyonar Giora Fiedman, inkontestavlemente, un grande virtuoz internasyonal de este instrumento. El es de la kuatrena jenerasyon de su famiya, djugando “Klezmer”. Su padre, buen muzisyen, ensenyante i pedagog, djugo un rolo determinante sovre la formasyon muzikal i la karyera de Giora.
Es inkreivle komo el puede ekspresar kon su klarineta, los sentimyentos i las bozes komo riza, yoro, egzaltasyon ets... Si no me yerro, era en el otonyo 2001. Tuve la oportunidad de sintirlo aki, en Estambol, en el kuadro del Festival de Djazz, organizado por una banka Turka. Poko tyempo antes, estuvo de muevo en muestra sivdad. En metyendo el punto final, sueto al grande virtuoz internasyonal, munchos anyos mas en su karyera. Espero ke va kontinuar a dar mesajes de paz, unyon i solidaridad, kon el sonido de su klarineta i kon sus palavras...El uniko sentimyento ke Giora Feidman no puede ekspresar kon su klarineta, es aborresyon...
(*)- Manadero de este paragrafo: el jurnal “Jewish Chronicle”
