grande universitaryo profundamente konsernado por el Judaizmo i tambyen el Sefaradizmo
A mi retorno de un viaje ke ize en Fransa, despues kaji 4 semanas de absensya, topi en mi correo elektroniko un mensaje del Prof. Haim Vidal Sephiha anunsyadome la disparisyon a la edad de 60/65 anyos de Richard Ayoun, afamodo universitaryo espesyalizado (entre otros ramos de la Istorya) en el Judaizmo sefarad.
Mi pena fue grande...no lo konosia personalmente ma tuve la okazyon de meldar munchas de sus eskritas i oyi muncho avlar de su grande valor umana. Facha luminoza del Judaizmo, konsagrado al estudyo i a multiples investigasyones, el eskrivyo sovre los djudyos de la epoka antigua asta el periodo medyeval i tambyen sovre la Istorya kontemporeana de los Djudyos en tyerra de Islam.
Vos transmeto debasho de estas linyas (traduzidos en Jud.Esp.) unos kuantos pasajes del elojyo echo a la okazyon de esta doloroza disparisyon, por muestro amigo el Profesor Haim Vidal Sephiha:
“RICHARD, tan brutalmente arrankado a la vida, tu ke ainda tenias tantas kozas a bivir i tantas kozas a dizirmos..
El 26 del mez de Enero, mos aviamos topado los dos kon el Profesor Ephraim Riveline para la prezentasyon de la “tesis” de uno de tus dishiplos. Estavas ainda valyante, kestyonando metodikamente el kandidato, kon todas tus kualidades umanas de erudito, investigador i pedagogo...
Tu fuites syempre respektado por los etudyantes, apresyado i konsultado en la preparasyon de numerozos programas de agregasyon de Istorya, ombre kuryozo de todo, syempre dezeozo de ambezarse, entender i transmeter.
Grande profesor, autor de multiples lavoros, tu fuites amado de todos Tu kontribusyon es remarkavle, prezentates el Judaizmo klaramente i kon muncha lusidez...tu solo ke dominates tan perfektamente el sujete puedias azerlo...”
