Salud i Refuah kumplida a muestra kolavoradora Coya Delevi
Vyernes pasado, muestra kolavoradora Coya Delevi se rompyo el pye syedro a la sigida de una desfortunada kaida, lo ke nesesito una intervensyon shirurjikal immedyata. Su estado de salud esta en este moment bueno i probablemente eya puedra salir en poko del ospital. Le auguramos un rapido restablesimyento, salud buena i alegria.
Izzet Bana i las Estreyikas de Estambol seran en Cordoba Alhad el 7 del mez koryente
Izzet Bana i “las Estreyikas” fueron invitados por la komunidad de “Cordoba” a partisipar al programa del dia de la Kultura Djudia Evropea.
El evenemento es muy sinyifikativo i konfirma una vez mas la importansa del esforso de muestro amigo Izzet Bana ke supo rekojer ninyos de diferentes famiyas para ambezarles kantikas en Judeo-Espanyol ke azen parte de la kultura Sefarad.
Todas muestras felisitasyones a Izzet Bana i a los chikos kantadores a los kualos auguramos “reushita buena”.
Eran Nahmiyas trusho alegria i kontentez a las famiyas Feldman i Nahmias
Muestra komunidad se enrikesyo de un muevo myembro nombrado “Eran” ijo de muestra ansyana kolavoradora Selin i de Yusuf Nahmiyas.
El Dyo ke lo bendiga; mazalozo i venturozo ke el sea, syempre provechozo para su entorno, su komunidad i su payis.
Todas muestras felisitasyones a las famiyas Nahmiyas i Feldman i la ekspresyon de muestros fuertes sentimyentos de amistad.
Muevo renkontro entre Mahmud Abbas i Ehud Olmert
Alhad el 31 del mez de agosto, el primer Ministro Israelyano Ehoud Olmert resivyo, en su domisilyo de Yerushalayim, el Prezidente Palestinyano Mahmoud Abbas para diskutir sovre la prosedura de Paz. Los dos ombres ya se avian enkontrado antes tres semanas.
Todo en rekonosyendo ke kedo ainda diverjensyas a reglar, el porta-boz de Olmert “Mark Regev” deklaro ke los dos shefes izyeron progresos muy sinyifikativos .
Segun el entorno del kapo del Governo Israelyano, Ehud Olmert dezea ke los negosyadores Palestinyanos sinyen un dokumento detalyado afirmando el akordo konkluido kon Israel , atestando ansi los progresos ke fueron realizados asta oy, ma un kolaborador de Mahmud Abbas izo saver ke su kampo refuza kualkyer akordo parsyal.
