Martes el 2 del mez koryente, eramos numerozos al torno del Gran Rabbino Rav Isak Haleva i otros myembros del Betdin ainsi ke de los dirijentes de muestra Komunidad, delantre las tombas de los ke, 22 anyos antes, fueron las viktimas de la primera verdadera manifestasyon de fanatismo rasyal en Turkia.
Eske este akto de salvajeria perpetadro por individuos por la mas parte estranjeros, kontra personas enteramente sin defensa, no era paradoksalmente la konsekuensa tardiva de la epoka nazi, esta epoka ke avia arrebivido el "odyo" i la "irra" en algunos espritos asolombrados por prejuisyos ke datan de la epoka antigua?
Es ke al kontraryo, djustamente despues de la Shoah, la umanidad en su totalidad no devia tomar konsensya de la inyovle horor de akeyos tyempos?
22 anyos despues el terrivle evento, aunke ya konosko mas o menos la razon inisyal , no puedo ainda realmente konsever lo ke fue la fuersa imperativa de negativizmo, ke pusho estos mansevos venidos de otros payizes, a perpetrar un akto kriminal de esta dimensyon, en una keila ande se topava unos kuantos yahidim en estado de orasyon, todos muy leshos de kualkyer aktividad politika .
Akel dia kuando kon unos kuantos amigos mos aviamos echo un dever de ir ayudar,de ke manera ke fuera, los serkanos de las viktimas, no solo en sus terrivle desmamparo ma tambyen en sus estupefaksyon doloroza, akel dia aviamos sentido ke mos topavamos delantre un kavzo mas terrivle ke un akto de vengansa, mas imperyozo ke un djesto de revolta o de revendikasyon ...akel dia aviamos sentido ke mos topavamos delantre el “mal por el mal”.
La dolor por seguro se kalmo kon el tyempo...el es un grande afalagador; el instinto de konservasyon mos pusha de una manera kaji invensivle, mizmo kontra muestra voluntad, a sekar muestras lagrimas i a ir verso la vida ... los chikos akontesimyentos de la egzistensya de kada dia, alegres o tristes, mos forsan a pensar a otra koza, a yorar o riir por otras kozas.
Ma, en mozotros syempre una estranya sensasyon de malestar,de profunda perturbasyon moral... el sentimyento de una umanidad ke munchas vezes falta de umanismo.
Semos kaji kada dia testigos de una mueva invensyon teknika, una mueva deskuvyerta syentifika... muevas provas del immenso poder de la intelijensya umana sovre la amplitud del mundo mineral o vejetal mos son dadas kontinualmente...ma es ke la konsensya umana pudo segir esta evolusyon kon la mizma vigor? Es ke eya pudo alkansar al nivel de sensibilidad ke puedra permeter al ombre de trespasar los entrompesos materyales de la egzistensya aktual, afin de ir mas leshos, asta la akseptasyon del otro ?
Ay de esto 22 anyos, 22 personas muryeron en este terrivlo asalto sin ninguna justifikasyon... brutalmente, indjustamente .... sus trasas kedaran syempre gravadas en muestro esprito ....No mos olvidaremos nunka de eyas ...por respekto enverso sus memorya i tambyen para ke nunka nunka semblavle desgrasya no se repete mas.
