Si me demandan a mi, kualo es,
“En la vida lo ke mas keres”?
Sin ezitar respondo estos byervos:
“Siguro, son mis keridos inyetos…”
Un otro diya de fyestar…Despues de los diyas de las madres, i de los padres, no se si ay ke konosen la egzistensya del diya de los “AVUELOS.” Aze munchos anyos ke se fyesta en los Estados Unidos. Aki no es muy popular por la ora, porke jenaralmente en el “Diya de la Madre” o el “Diya del Padre” se selebra tambyen i el de los avuelos. Lo ke topo muy normal, eyos son djenitores antes de ser avuelos....
Esta fyesta se selebra en la primera semana del mez de Septembre, ma no tyene una data fiksa a lo ke entendi. Me esto akodrando ke tengo meldado una fraza semejante sovre la data: esta fyesta kaye el primer diya de Alhad, sigiendo el “Labor Day” (İşçi Bayramı) de los Amerikanos. Ansi kreo ke ya solvimos un problema importante!!... Asigun entendi, no tyene una data fiksa. Es un poko komo las selebrasyones ke nombrimos mas arriva. En este momento, regreto de no pueder dar la data egzakta de oganyo.
Syertas personas konsideran estos diyas espesyal komo pretekstos para gastar, i par konsekuensa lo kritikan. Ma yo digo a la kontra, ke estas chikas fyestas inosentes son okazyones, por no dezir pretekstos, para reunir la famiya. Mozotros avuelos pensamos ke no ay menester de regalos karos. Afilu un beziko o un ramo de flor mos abasta. El esensyal es estar endjuntos. Una komida en famiya es para mi ideal en diyas semejantes.
Kuando se avla de avuelos, inevitavlemente se evoka personas mas o menos aedadas. Malgrado lo ke desha prezumir este byervo, syempre no es ansi. Todos los granparyentes no son aedados. A la kontra ay ke paresen ermanos o ermanas de sus ijos. Yo tengo amigas de mi edad ke, ay anyos, son no solamente nonas, ma tambyen “biznonas”...
Ay un fakto, ke seyan mansevos o no, los avuelos son amigos maraviyozos. Sekretaros (sırdaş) de los inyetos ke munchas vezes konfian sus chikos sekretos inosentes.. Sekretos ke no tyenen ozadiya de aklararlos a sus djenitores. Para mi syempre fue komo un fenomeno de konstatar el buen akordo, kompleto entendimyento ke egziste entre estas dos jenerasyones. Malgrado los nombrozos anyos de entervalo entre las jenerasyones, los raportos entre inyetos i avuelos es un sentimyento ekstraordinaryo, difisil de pueder eksprimir kon palavras. Los ke lo biven, lo syenten lo konosen muy byen este sentimyento...
Agora, por terminar vos va kontar otruna vez la konsejika de las dos granmamas:
“Dos granmamas kada una tomando su inyetiziko, se fueron a pasear. Se kedaron en un bodre de mar. Las “nonas” entraron en un moabet ondo!, myentres ke los dos chikos djugando kon las arenas, kuvos i paletas.
En supeto, vino una ola imensa, i se yevo una de las kriaturas. En vyendo esto, la granmama empeso a gritar, a yorar, a pelarse los kaveyos. No paso muncho, enduna, komo la primera vez, vino de muevo una grande ola, i esta vez, traendo atras la kriatura la echo sana i rezya ensima las arenas. Alora, de la alegria, la nona, no supo kualo azer, koryo verso la mar avyendo las manos al sielo en rengrasyamyento, todo en kontinuando a gritar: “Mi inyeto teniya un chapeyo, vestiya un chapeyiko, ke se izo?!…”
