Un artikolo muy elojyozo al sujeto de la aktividad pozitiva i dinamika de la Turkia paresyo en el periodiko elektroniko Fransez “Le Nouvel Observateur” de Shabat pasado.
Mos izimos un plazer de traduzirlo afin de komunikarlo a los lektores del Şalom: “Lo konstatamos kada dia mas. Grasyas a su situasyon jeografika, su enfloresimyento ekonomiko, la aktividad de su diaspora i la kapachita de sus dirijentes, la Turkia ke era marjinada (kenarda bırakılmış) desde el anyo 1918, devino un aktor major de la diplomasia internasyonal.
Desde los mezes de Abril i Mayo 2008, el primer Ministro Erdoğan es el intermedyaryo de negosyasyones de Paz entre la Syria i Israel. Djuevez el 4 del mez koryente,el se topava prezente kon el prezidente Sarkozy en la konferensya kuadripartita de Damas.
El ministro Turko de las relasyones eksteryores ke vyene de tornar de Mosku propozo, el, una plataforme de estabilidad en el Kokas.
La Turkia djuga un grande rolo en Irak (relativamente al Kurdistan) i tambyen en Iran, payis kon el kual eya tyene ekselentes relasyones, en la Mar Preta de la kuala eya kontrola el akseso i enfin en el Otan del kual Ankara es uno de los prinsipales kontributores.
Esto no es todo. Afin de pueder aumentar su rolo en los echos mundyales, el Governo Turko dirijido por el partido Islamisto moderado AKP, parese kerer reglar, en una atmosfera de trankilidad, los vyejos konfliktos ke handikapan su diplomasia desde munchos anyos.
Myerkoles pasado el tres del mez koryente, los dirijentes de las partidas Norte i Sud de Shipre avyeron Negosyasyones Istorikas sovre la reunifikasyon de la isla dividida desde el anyo 1974.
I Shabat el 6, otro evenemento Istoriko: el Prezidente Gül se topo prezente al mach Ermenia-Turkia a Erivan.Primera vijita de un prezidente del Estado Turko en un payiz ke fue su enemigo ereditaryo.
Este grande retorno de la Turkia sovre la shena mundyal (retorno pasifiko en su mayoria) es un modele ke devra inspirar otras potensyas, los vyejos imperyos i partikularmente la Rusia.”
