El "Hürriyet" de Shabat pasado mos dyo un artikolo sinyado por Mehmet Y.Yılmaz, al sujeto del livro de Bension Pinto, entitulado “Geniş toplumda Yahudi olmak”.
Fue para mozotros un grande plazer de traduzir esta eskrita afin de prezentarla a los lektores ke no tuvyeron la okazyon de meldarla.
Esto dicho, desharemos la palavra a Mehmet Y. Yılmaz:
“Me tengo topado en bodas, funerales o Barmitsvas de muestros konsivdadinos djyudyos i syempre tuve un sentimyento de admirasyon delantre el esforso echo para konservar vyejas tradisyones en un medyo muy kultivado.
Ay de esto unos kuantos dias en un livro ke meldi de un tiron, enkontri un ritual ke personalment no avia remarkado. “En las bodas djudias se formula una orasyon, rogando el Todo Poderozo ke nunka el Prezidente de la Republika no manke de la kavesera de la Nasyon i de la Komunidad.
Esto es por seguro la ekspresyon de un afekto partikular enverso la Republika.
Ken save? Puede ser ke las raizes de esta vyeja kostumbre se topan en la epoka de la inkizisyon Espanyola, kuando despues de aver fuyido del payis ke los maltratava i arrondjava, los djudyos avian topado una tyerra tolerante i ospitalyera ke los resivyo kon byenkerensya .Es muy probable ke esta tradisyon date de este periodo, en sinyo de gratitud enverso el Sultan de akeyos tyempos.
El livro del kual vos avli mas arriva es kompuesto de las memoryas de Bensiyon Pinto, el presedente prezidente de la komunidad djudia. El titolo es “Anlatmasam olmazdı –geniş toplumda yahudi lmak” (No puede ser de no kontar- lo ke es ser djudyo en una otra Mayoria).
La vizyon sosyal de Bensiyon es fuerte i ancha...Ya konosia su esprito de solidaridad enverso todos los ke se topan en momentos de difikultad. Agora kon este livro, entendi ke el es tambyen un buen eskritor.
Desde largos anyos en syertos medyos sosyales, los djudyos son konsiderados komo la huente de todos los males.
Ke sean de la syedra komo de la derecha, integristos o komunistos, algunos de entre eyos partisipan a una kampanya de antisemitizmo.Uvo mizmo personas ke demandaron sus ekspulsyon del payis.
Personalmente, durante mi vida, me senti feliche de las relasyones de karinyo ke tuve kon amigos djudyos ke konosi de serka i nunka pude eksplikarme la toleransya kon la kuala eyos konsideran esta situasyon.
En meldando el livro de Bension Pinto, penso ke pude topar el sekreto de esta aktitud. Eyos por seguro konosyeron munchas desiluzyones. En las ojas pretas de muestra istorya se topa los evenementos de Trakya ke metyeron los djudyos en un estado de terrivle desmamparo, uvo el impuesto sovre el revenido del 6-7 Septembre i tambyen algunas otras chikas kozas...
Ser konsidarado komo una minoria kere un poko dezir ser konsiderado “otro”. Esto lo entendi en meldando el livro de Bension Pinto.”
