En Cern Enriva Un Projekto İnkreivle Sovre La Evolusion Del Universo
El 10 Septembre, a las 10:28 de la demanyana, en CERN, el primer rayo de LHG, se dirijo kon reushita, alrededor del mas puederoso akselerador de partikulas del mundo entero.
Este evente historiko marka un momento muy emportante en los deskruvimientos sientifikos.
El dirijador de este projekto, Lyn Evans, esta dizyendo ke este momento fantastiko va empesar una mueva epoka en el entendimiento de los orijines (de la evolusion) del universo.
“El LHC es una makine de deskuvrimiento” disho el Direktor Jeneral de CERN, Robert Aymur. “El program de investigasion de esta makine tiene el potansiel de trokar, profondamente, muestra vizion del Universo”.
La realizasion de esta makine marka el empesijo de una revolusion en el bombardamiento de partikulas.
Sientifikos de munchos paizes fueron eskojidos por este projekto en CERN. Estos sientifikos estan gloriozos de kontribuar a este projekto i de lavorar edjuntos kon miles de koleges del mundo entero.
El Primer Ministro de İsrael, Ehud Olmert, avlo kon Prof. Giora Mikenberg sovre este sujeto. Mikenberg es el direktor del ekipo de los sientifikos israelianos ke estan partisipando a este projekto.
“El eksperimento esta aziendo un progreso mijor de lo ke esperavamos” le disho Mikenberg al Primer Ministro. “Yo, de mi parte, esto muy optimisto sovre la reushita de este projekto”.
En este eksperimento, los sistemes de teknolojjika de İsrael (ke son los mas avansados del mundo), se estan utilizando. Ademas, los sientifikos israelianos estan lavorando endjuntos kon sientifikos palestinianos i kon sientifikos del mundo arabo. Segun Prof. Mikenberg, esta kolaborasion va avnsar la pas entre İsrael i los paizes arabos,
El Prof. lo remersio a Olmert por su grande ayuda i por el suporto ke el Estado Israel les esta dando a los sientifikos israelianos.
“Esto muy orgoliozo por la kontribusion de los sientifikos israelianos i de la teknolojiya israeliana en un eksperimento tan emportante ke puede enfluensar la umanidad entera” disho Olmert. “İsrael es una grande potansiel en la teknolojya i en la siensia. Sientifikos İsraelianos okupan un lugar muy onoravle en estos kampos. El Estado de İsrael esta muy kontente de dar suporto a este projekto i espera de asistar a otros projektos en el futuro, para pueder aparejar un futuro mijor por toda la umanidad”.
