Estos de alkavos dias el imbroglio es grande en los Estados Unidos, envezes inekstrikavle.
De una parte: En un mez "la eleksyon prezidensyal"; la prensa no solo amerikana ma mundyal mos informa dia despues de dia a este sujeto.
Ansi,komo ya lo meldariash en las gazetas Turkas komo Internasyonales, djuevez el 25 del mez pasado fue el primer enkontro ofisyal entre los dos kandidatos, todos los dos perfektos en sus refleksyones, McCain muy kalmo, kaji syempre sonriente, Obama un poko krispado, muy emosyonado ma syempre byen konsyente i briyante en sus replikas.
Komo se entyende byen, munchos sondajes fueron echos despues del debate, en el de alkavo echo por el CNN: 30% kedaron indesizos, 41% favoravles a los demokrates i 27/29% votaran por los republikanos.
McCain pudo konvenser sovre la politika a aplikar a la kestyon Irakyana, Obama sovre las kestyones ekonomikas. Antes del debate solo 44% de los elektores pensavan kel kandidato demokrato sera kapavle de asumir la funksyon de Prezidente, despues del enkontro 60% lo pensan.
Segun el sondaje de la C.B.S, konsakrado a este mizmo sujeto, sovre 500 elektores indesizos: 66% de entre eyos pensan ke Obama puedra tomar buenas desizyones konsernando la ekonomia.
"PCW Research Center" mos ambeza,el, ke Obama esta de 7 puntos adelantre de McCain. "Magazin Time" atribue 50% de los votos a los demokratos kontra 43% a los Republikanos.
El kotidyano Fransez "le Monde" mos dize ke munchos Amerikanos asperan del kandidato demokrato: un amenguamyento de los impuestos ke konsernan partikularmente la klasa medyana, una seguridad de la salud i tambyen una mueva politika enerjitika ke puedra krear miles i miles de empyegos.
Las inisyativas individuales de munchos personajes no mankan tambyen de manifestarsen en favor de tal o tal otro kandidato . Ansi, la aktrisa byen konosida Barbara Streisand organizo un festino afin de rekojer fondos para la kampanya de Obama i obtuvo 27/28000 dollares.
De otra parte,no mos olvidaremos ke ay en este momento en los Estados Unidos "el terrivle teremoto finansyero" ke reboltea no solo la situasyon ekonomika del payis ma tambyen el esprito de munchos grandes espesyalistos en la kestyon . Muevas refleksyones, muevas sugjestyones immedyatamente kritikadas, desmentidas kon propozisyones aplikavles o no...
Una manyana la esperansa aparese, ma tres oras despues es el mizmo temor,la insertitud i la vizyon de una prekaridad ke munchos amerikanos no konosian asta agora.
El governo propozo una mezura muy severa, kontrarya al esprito de liberalizmo al kual la plasa ekonomika Amerikana estava auzada: "su intervensyon en el kampo de la ekonomia" ...Komo ya lo meldariash, las kritikas fueron fuertes, las protestasyones numerozas i el Parlamento Amerikano el mizmo refuzo de admeter immedyatamente este plano.
I en este empesijo de kaos, el Parlamento Amerikano ke al empesijo kontesto la propozisyon governomental i devia ainda diskutir i diskutir, serro sus puertas Martes i Myerkoles pasados, en sinyo de onor enverso "Rosh a Shana" . Es solo
despues la fin de la grande fyesta Djudia, ke las diskusyones re-empesaron en la grande Institusyon Politika i kel plano Paulsen de 700 milyardas pudo ser akseptado.
Si,onorar la grande fyesta djudia es un uzo de kada anyo en los Estados Unidos, ma esta vez, en este periodo de proksima eleksyon prezidensyal i de terrivle kriza finansyera ande miles de kestyones de una importansa absoluta para el avenir del payis deven ser debatidas, este djesto toma un senso muy partikular, kaji prodijyozo.
Malorozamente oy, alhad demanyana el 5 Oktobre, malgrado la adopsyon del plano Paulsen, kaji el mizmo sentimyento de insertitud persiste syempre.
