Aserkandomos a la fin de las fyestas no keryendo alesharme de esta atmosfera, kualo de mas apropyado ke avlar de “amistad”? Ya tengo eskrito bastante sovre esta tema, relatado esta dicha de un pensador: “La amistad no es komerse de parte a parte, ma tener ambre endjuntos...” Oy kero adjustar tambyen, “es alegrarse endjuntos o atristarse endjuntos”... Keridos amigos, deke tuve agora el dezeo de tornar a esta tema? .. Todos tenemos menester poko o muncho de apoyo i fuersa moral. Esto lo esto sentyendo de mas en mas en estos diyas difisil ke esto pasando. No kero mas avlar de mi aksidente. No kero afilu ni pensar. Ma lo devo para pueder kontinuar a eskrivir este artikolo. En akeyos diyas resivi un montante de mesajes, entre otros munchos del sititio “ladinokomunita”.
Este sitio de “Internet” fondado por Rachel Amado Bortnick es un forum ekskluzivamente en Judeo-Espanyol ke aktualmente deve kontar komo mil aderentes. Yo no so miembra. Portanto me syento komo apartener a LK. Meldo los mesajes, de vez en kuando eskrivo i yo. Los embiyo par el intermedyaryo de un miembro, serkano miyo ke se okupa tambyen de darme los mesajes ke vyenen para mi, komo fue el kavzo ultimamente. Aki no puedo sitar uno por uno los manaderos, del espanto de olvidarme alguno. Estos amigos, eyos ya se saven i los rengrasyo a todos de alma i korason por sus amistad.
Antes unos kuantos mezes vino a Estambol un grupo de LK, de las kuatro partes del mundo. Ansi tuvimos la shans de konosermos personalmente. Me izo grande plazer de ver ke ya me konosen de nombre, syendo ke meldan el “Şalom” i “El Amaneser”. Agora kon vuestra permisyon kero avlar de dos amigas, la una fondadera, la otra moderadora de LK. La kerida Rachel Bortnick... En primero la konosi en el 2003, myentres su vijita a muestra gazeta. İ este enverano mos vimos unas, dos vezes. Me mando un mesaje ke kero transferar byervo por byervo:
“Kerida Coya,
Me izo pena de saver (por Güler) ke te kayites i te se rompio guesos de las piernas. Gechmish olsun kerida. Presto ke te sanes, no solo porke te tenemos de menester, ma tambien porke te keremos bien. Si estava ayi iva vinir a verte i te iva trayer este kuti de shokola kon rozas.
Te mando mis bezos, kon amistad de korason. Rachel de Dallas.”
Rachel me mando una ermoza illustrasyon: un kuti de shokolas Godiva, al lado de un buketo de de trandafilas. Una kompozisyon tan artistika, ke la transferi al ekran de mi komputer. Munchas grasyas kerida Rachel...
Rosina de Florida... Desde ke ampesi mis rekuerdos en “El Amaneser”, puedo dezir ke se fraguo un ponte de amistad entre mozos. Tenemos un punto komun: pasimos muestra chikes en el mizmo distrikto de Galata, “El Kal de los Frankos.” Ay probabilidades ke mos konosimos, ma no esto sigura. Ma konosko sus amigitas, de kualas me dyo los nombres. Una de eyas es la madre de muestra Gila Erbeş del “Şalom”. Rosina se entereso a tal grado a mis rekuerdos, ke tuvimos korresondensya no solo por e-mail, tambyen par posta regular. En estos diyas Rosina munchas vezes me eskrivyo. Me mando una poezia tomada del livro de Sara Benveniste. Yo vo dar aki solo unos, dos versos, ke reelmente estan traduizando mi dispozisyon mental i fizika de antes unas kuantas semanas... La Kayida..
Es muy triste azer una kayida,
En un punto te se troka la vida.
Una ora antes yena d’enerjiya,
En vista sos una kukla vaziya...
Munchas grasyas i otruna vez: SHANA TOVA.
