Hazan Isak Maçoro mos decho la buena vida el 20 Octobre, 2008., Maçoro fue el shefe hazan de la Komunidad Djudia d'Estanbol. El fue renomado por su boz i su savderya de makames. Hazan Isak Maçoro lavoro en las mas grande sinagogas mas de 50 anyos.
Su nombre sera komemorado tante ke va bivir la Komunidad Djudiya de Turkiya. Ke su alma repoze en paz i muestras sinseras kondolensyas a su famiya.
Hazan Isak Maçoro
Hazan Isak Maçoro, nasio en Hasköy, Estambol, en 1918. Kuando teniya solo kuatro anyos, dyo los sinyales de su karera kuando empeso a imitar el meldar de perasha en metiendose un dimalo al lugar de tallet i teniendo un bastoniko al lugar de puntero. Despues de su Bar-Mitsva a 13 anyos, empeso a meldar los maftirim kon Isak Algazi en el Kal de los Frankos i en la Sinagoga Knesset. En la Knesset lo introdusieron komo “el mansevo kon muy ermoza boz ke melda perashas muy bien”. El estudio en la Knesset kon el shefe del koro de maftirim Kemal Abenatar (orijinaryo de Edirne). Kuando izo su primer kazamiento a 17 anyos, la djubbe ke yevava estava tapando sus pantalones kurtos i dainda nesesitava 12 anyos para su proprio kazamiento.
Despues de eskapar la eskola Bene Berit, Isak Maçoro se fue a la falultad de Ley. Despues de estudiar ayi dos anyos, el desidio ke seria un mijor hazan ke avokato i desho a la fakultad. Se izo Shefe Hazan en la Knesset en 1939. Entremientres estudio kon la profesora Alice Rosenthal del konservatorio kantar i solfedjio. Developo a su boz de tenor i fue kapache de adaptar su boz a la muzika ala franga komo ala turka, koza ke no es fasil de azer. Estudio la muzika klasika Turka kon Asım Gürsoy ma komo era muy interesado en esta muzika lo mas se lo ambezo de si para si. Komo el konosiya el Ebreo muy bien, se entendiya lo ke diziya i sus interpretasiones de lo ke kantava era perfekto. Durante todos sus anyos en ke estava lavorando se preparava para lo ke iva kantar el Shabat todos los diyas de la semana en meldando de dos livros, uno kon puntos otro sin puntos asta ke se aziya perfekto.
Su edukasion relijioza lo tomo del Gran Rabino Saban, Rav Rober i Rav Pinto. Kuando la sinagoga Neve-Shalom se avryo en 1950, el fue transferado ayi komo el solo kandidato. De 1965 asta 1979 el lavoro en el Kal de Şişli i despues se jubilo.
Dos anyos despues, en 1981, empeso a lavorar en el Kal de Büyükada asta ke retiro de su karera aktiva. Hazan Isak Maçoro fue renomado por su boz i interpretasion fenomenal, su saviduriya de makames, su karizma ekstraordinarya i su responsabilidad en todo lo ke aziya no solo en Turkiya ma en el mundo entero. El lavoro en las mas grandes sinagogas de Estambol mas de 50 anyos. Isak Maçoro tiene dos ijos i 4 inyetos.
De la koleksyon de Maftirim ke va apareser en muy serka.
