El puevlo Amerikano preokupado por dos grandes problemas: La situasyon ekonomika i la eleksyon prezidensyal
Myerkoles 15/10/08 en los Estados Unidos,antes del treser debate prerzidensyal:
Segun el sondeo publikado dia de myerkoles pasado (8/10/08) por el kotidyano "USA Today" 91% de Amerikanos estan deskontentes de la situasyon ekonomika del payis, i 84% pensan ke la kriza se agravara en serka. Dos amerikanos sovre tres dizen aver sido chapteados (golpeados) en el portofolyo. ets... ets...
Ansi las tres semanas ke kedan asta la Eleksyon seran dominadas por un solo tema: "la ekonomia" i las propozisyones de los dos kandidatos para salir de la kriza o a lo manko para amortisar sus efektos negativos.
Syempre segun "USA Today", Barack Obama no pudo ainda konvenser enteramente todos los amerikanos ke el puedra azer salir el puevlo de esta situasyon ekonomika katastrofika. Por las oras solo 44% tyenen konfiensa en sus proyektos kontra 50% ke no kreyen en sus efikasidad.
Konsernando McCain, 31% pensan ke el tyene buenas ideas para luchar kontra la kriza, ma 63% no asperan nada de el.
Myerkoles la noche durante i despues la konfrontasyon de los dos kandidatos en la Universidad Hofstra de Long Island.
La tresera konfrontasyon McCain/Obama fue konsiderada de la parte de la prensa Amerikana komo la mas interesante i la mas kombativa.
McCain muy agresivo paso la mayor partida del tyempo a atakar su adversaryo sovre diferentes puntos: prinsipalmente sovre sus relasyones kon el militante radikal "Bill Ayers" kulpavle de varios atentados ay de esto unos kuarenta anyos i kon la Asosyasyon "Acorn" akuzada de "enganyo elektoral" mizmo si es sovre todo la kampanya Republikana ke es la mas manchada.
El akuzo tambyen el kandidato Demokrato de reanimar la lucha de klasas en pujando las taksas de los rikos kon el objetivo de redistribuir la rikeza.
Barack Obama supo guadrar su kalmo i respondyo kon muncha moderasyon i dinyidad a las atakas, el supo kedar kaji syempre sonriente, sin ningun ekseso i avlo kon una retorika briyante sin sofistikasyon.
A la kestyon de McCain: "Deke keresh pujar los impuestos?" El kandidato Demokrato respondyo "Keremos todos los dos ke los impuestos amengen" i ekspliko alora ke su programa sera provechozo para la mayor parte del puevlo i ke solo un punyado de kontribuyentes seran realmente taksados.
Ansi, kaji immedyatamente despues la konfrontasyon, la prensa Amerikana saludo un McCain kombativo i un Barack Obama kalmo, ma nada troko disho un djornalisto.
Segun el Washington Post, el kombate se paso entre un pedredor i un adversaryo ke supo guadrar su kalmo debasho multiples kritikas justifikadas o no i responder klaramente .
El kotidyano New-York Times afirmo, el, ke la taktika i el tono de boz de McCain no ayudaron el kandidato Republikano en la defensa de sus muevos argumentos.
Lo ke partikularmente no troko kaji deltodo fue la konkluzyon. Segun el sondaje ke la CNN izo sovre los ke sigyeron la konfrontasyon: 58% deklararon ke Obama salyo ganador del debate i solo 31% mostraron McCain komo viktoryozo.
Los Clinton mujer i marido afirmaron, eyos, ke Obama triumfo anchamente. Hillary disho: “Fue menester de un prezidente Demokrato para alimpyar el terreno despues del mandato del primer prezidente Bush, i agora kale de muevo un prezidente demokrato para alimpyar despues del mandato del aktual prezidente Bush”.
Segun lo ke eskrivyo un djornal, un grupo de mansevos djudyos favoravles a Barack Obama, ke tyenen sus avuelos mas konservadores, retirados en Florida, se rendyeron serka de eyos para eksplikarles klaramente sus punto de vista.
Ansi pasaron el dia i la noche de este Myerkoles del mez de oktobre.
Alhad, el 19 del
mez de oktobre
El General Powell, eks-Sekretaryo del Estado del Prezidente Bush, se deklaro favoravle a Obama, viendolo mas kapavle de asumir la misyon de Prezidente i kontestando la manera en lakuala McCain administro su kampanya, komo su seleksyon de Sarah Palin entanto ke kandidata a la Vice-Prezidensya.
Es muy probable ke esta deklarasyon de Powell tenga una grande influensya sovre la desizyon de los ke estan ainda ezitantes.
