Los byervos mos mankan munchas vezes para ekspresar egzaktamente lo ke resentemos, komo una imposibilidad de topar las djustas palavras para formular syertos sentimyentos.
Fue ansi del chiko fakto ke se paso en las kayes de New York ay de esto unos kuantos dias i ke malorozamente no pudimos transmetervos immedyatamente en la pajina Judeo Espanyola de la semana pasada, por kavza de falta de lugar.
El kavzo es el sigyente: Un Amerikano (filantropo o no) ke kijo kedar inkonyito debasho grandes antojos pretos sovre los ojos i un bonete de lana sovre la kavesa, proyeto de distribuir en las kayes de kuatro grandes sivdades amerikanas, la suma de 500.000 dollares, esto afin de akudir por unos kuantos dias, menesterozos ke se topan aktualmente en una situasyon difisil.
Munchas personas dizen ke se trata de un simple djesto de publisidad, una manera de azerse konoser, lo ke tyene para su entorno una efikasidad pasajera... Otras pensan ke se trata simplemente de un ermozo fakto diverso, uno de estos ke mos alegran por un syerto tyempo i immedyatamente despues dezaparesen en el tumulto de la vida kotidyana…
El septisizmo devino una manera de pensar de muestro tyempo i kon el, el sospecho otomatiko de la otentisidad de kualkyer akto karitativo.
Esto es puede ser komprensible en una epoka ande savyos byen konosidos por la profundura de sus refleksyones i la egzaktitud de sus sugjestyones en el kampo ekonomiko, no tuvyeron el kudyo nesesaryo de kontrolar rigorozamente la evolusyon de sus teorias ni de kalkular lo ke puedran ser sus konsekuensyas sovre la klasa sosyal ekonomikamente flaka.
Si… En esta epoka ande fundasyones karitativas destinadas a akudir personas ke se topan en el menester fueron undidas en el remolino de espekulasyones lokas, los aktos filantropikos de grande dimensyon paresen sospechozos, sin ningun motivo ni razon.
Si… Estamos bivyendo un periodo difisil de negasyon de todo modo de valor moral, lo ke mos pusha a dubdyar de todo.
Si… En realidad, la suma en kestyon, repartida entre syenes de personas es leshos de ser sufizyente,eya no va rezolver ningun problema, ma tyene la posibilidad de dar koraje i puede ser puedra servir de egzempyo a una mueva era manko kruel.
En todo kavzo, es lo ke es, este ombre ke kijo kedar inkonyito debasho su bonete de lana i sus grandes antojos ke le kuvren una partida de la kara, este ombre ke distribuo bankenotas de 50 dollares en la kaye despues de aver oido la istorya de kada uno, deshara una trasa en muestra memorya...
Kual ke sea el grado de muestra deskonfiansa, el mos da una esperansa, komo una chika luz en la eskuıridad aktual. Ay eventos ke se enganchan en muestro esprito, mos pushan a refleksyonar, mos persigen asta devenir una obsesyon komo si yevan, en eyoz mizmo, una sinyifikasyon partikular.
