El Festival Mistiko kultural
El ‘’Mistik Sanat Festivali‘’ (Festival Mistiko Kultural) organizado por la Munisipalidad de Estambol serro sus puertas Lunes la noche en una atmosfera de kayente konvivyalidad de la parte de sus koordinadores.
Maraviyozo enkontro etniko de las tres grandes Relijyones Monoteistas,en una Eglisya medyeval transformada en sentro kultural; dos espasyos lado kon lado ande se respirava una profunda emosyon i una espiritualidad sin ostentasyon …En el uno la nostaljika i sensitiva muzika Otomana, en el otro la ekspozisyon de 21 ovras de muestra amiga Esti Saul.
La semana venidera vos daremos detalyos muncho mas eksplisitos sovre este realizasyon artistika de alta valor.
Felisitasyones de la parte de Barack Obama al prezidente İsraelyano Shimon Peres
Segun lo ke mos dize el periodiko elektroniko Fransez “Le nouvel Observateur” del 12/02/2009: Myerkoles pasado a la segida de las eleksyones lejislativas Israelyanas, Barack Obama felisito por telefon Shimon Peres a este sujeto i disho tambyen kel puevlo Israelyano deve ser muy orozo de aver dado al mundo el egzempyo de la demokrasia.
Los dos Prezidentes tuvyeron una konversasyon telefonika muy interesante, i Barack Obama saludo el engajamyento reafirmado de Shimon Perez de arreglar el konflikto Israelo Palestinyano en ovrando por la kreasyon de un Estado Palestinyano.
Persistyente kontroversya intelektual
200 anyos despues de la data de nasimyento de Charles Darwin, autor de la ovra ’’L’Origine des especes‘’ (el orijen de las espepesyes), la kontroversya entre las teorias kreasyonistas i evolusyonistas persiste syempre.
Dos maneras de pensar diferentes, dos maneras de pensar diametralmente opozadas ….
El Papa Benedictus XVI se adjunto al defundo Papa Paul II en su demanda
de perdonansya
A la okazyon de su enkontro kon prezidentes de varias asosyasyones Djudias Amerikanas, el Papa Benedictus XVI afirmo kel ’’negasyonizmo’’ es intoleravle i se adjunto al defundo Papa Paul II (de B.M.) en su demanda de perdonansya al sujeto de la Shoah ..
El Papa Benoit XVI konfirmo tambyen, sin presizar la data, ke el esta aparejando un viyaje en Israel.
