La semana ke pasimos, Papa Benedikto XVI, peno para kalmar una kriza entre los lideres judios i Vatikan.
‘No aviya kamaretas de gas en los kampos de eksterminasyon, i solo trezyentas mil judios murieron en estos kampos’ disho el klerjio Richard Williamson, en una entrevista kon la televizyon Sueda, en el 21 de Enero.
Duspues de este evento, el Papa alevanto la ekskomunion (aforoz) de Williamson, i lo aksepto a Vatikan, en el 24 de Enero.
Este komporto del Papa deterioro las relasiones judia-katolika. La komunidad judia enternasional i los lideres judios del mundo entero, lo kritikaron el Papa por este akto.
Vatikan deklaro ke Benedikto no estava al koriente de esta entrevista i de las ideas de Williamson, kuando lo aksepto a Vatikan.
El konsul jeneral de los judios de l’Almania korto el kontakto kon la Eglizia Katolika. Angela Merkel ensistio ke el Papa aga una deklarasion kontra este akto, i demande ekskuza de los judios.
‘İnyegar o minimizar los masakros terivles del Holokosto es intoloravle. Esto es un desrespekto a los ombres, mujeres i kreaturas ke murieron o sufrieron en este masakro, i en mezmo tiempo, es una veruensa kontra la umanidad’ disho el Papa Benedikto, a un grupo de sesenta lideres judios ke vijitaron Vatikan.
Benedikto repeto los biervos ke el aviya prononsado kuando vijito el kampo de la muerte en Auschwitz, en el anyo 2006: ‘Esto rogando ke la memoria de este masakro terivle, enfuerteska muestra desizion de kurar el malentendimiento de munchos anyos antes, ke deterioro las relasiones entre los kristianos i los judios.
Papa Benedikto repeto tambien, los biervos ke Papa John Paul aviya prononsado, en su vijita a la Pared Oksidantal, en Yerushalaim. John Paul aviya demandado ekskuza de los judios, por ke pardonen los kristianos ke mataron tanto judios en el Holokosto.
‘Esta oja terivle de muestra istoria deve de ser olvidada’ disho Benedikto, a la delegasion de los Prezidentes de las Prinsipales Organizasiones Judias de Amerika. ‘Esto rogando, ke las relasiones se enfuerteskan dagora andelantre’ ajuto el Papa a sus palavras.
Papa Benedikto konfirmo tambien, ke tiene entision de vijitar İsrael, en el mez de Mayo.
La delegasion judia ke vijito Vatikan, fue dirijada por el Rabino Arthur Schneier de New York, un sorvivente del Holokosto. ‘Los diyas ke pasi kuando oyi los biervos de Williamson, inyegando la raelidad del Holokosto, fueron muy dolorozos por mi’ disho el Rabino. ‘Las viktimas del Holokosto no mos dan la permision de pardonar, los ke inyegan este masakro’.
El Papa i el Rabino ekspresaron sus esperansa, ke el dialogo entre los judios i los katolikos seyga mas fuerte de antes, en salyendo de esta kriza.
Williamson demando ekskuza del Papa, dizyendo ke el fue el kavzo de estas polemias, ma el no tomo atras sus komanterias sovre el Holokosto.
