Rav. İzak Alaluf pyedro su padre
Es kon tristesa ke vos anunsyamos la muerte en Izmir de: Sinyor Nesim Alaluf padre de Rav Alaluf, Rabbino byen konosido i muy apresyado en muestra komunidad. Ke su alma repoze en paz. Muestras kondolensas las mas sinseras a la famiya Alaluf ansi ke la ekspresyon de muestros sentimyentos de amistad i simpatia.
Robert Wexler myembro del Kongreso Amerikano en Ankara
Myembro del Kongreso Amerikano i uno de los prezidentes del Grupo “Türkiye-Kafkasya”, Robert Wexler (de orijen djudia) estuvo la semana pasada en Ankara, envitado por el “ofis” del “Alman Marshall Fonu” i tuvo kontakto kon el Primer ministro Tayyip Erdoğan ansi ke kon otros grandes funksyonaryos Turkos
Antes de salir de Ankara,el enkontro varios djornalistos i les afirmo ke la Turkia aze parte de la Evropa. “A la sigida de la politika del partido AK durante las ostilidades entre Israel i Gazza, munchas personas se demandaron si la Turkia es un pedaso del Oksidente o del Oriente” disho Wexler ke fue un de los primeros a apoyar la kondidatura prezidensyal de Barack Obama “Ay muncho tyempo ke la Turkiya ya tomo la desizyon, eya es un pedaso del Oksidente. Eya desvelopo sus relasyones kon el resto del mundo i sige el interes rejyonal”. El deklaro tambyen kel Prezidente Obama puedra lavorar muy armonyozamente kon el Primer Ministro Turko Erdoğan. “Puedra aver chikas diferensyas de taktika konsernando el establesimyento de un dialogo kon el Hamas, ma el objetivo es el mezmo: la egzistensya de dos estados sovre una fuerte baza de paz”
Konsernando el problema armenyano, Wexler deklaro ke las relasyones desvelopadas kon Erivan por el Primer Ministro Erdoğan i el Prezidente Gül son muy rasyonales i pozitivas.
